ஜகாரியாவுக்கு 2008ம் ஆண்டுக்கான இந்தியா அப்ராட் விருது

நியூயார்க்: அமெரிக்காவின் புகழ்பெற்ற நியூஸ்வீக் இதழின் ஆசிரியரும் இந்திய வம்சாவளி பத்திரிகையாளருமான பரீத் ஜகாரியாவுக்கு 2008ம் ஆண்டுக்கான இந்தியா அப்ராட் விருது வழங்கப்பட்டுள்ளது.

இந்தியா அப்ராட் செய்தி நிறுவனம் ஆண்டுதோறும் அமெரிக்காவில் வசிக்கும் சிறந்த இந்தியரை தேர்வு செய்து விருது வழங்கி வருகிறது. கடந்த 2007ம் ஆண்டுக்கான இந்த விருதை பிரபல ஹாலிவுட் இயக்குனர் மீரா நாயர் பெற்றார்.

இந்த ஆண்டுக்கான விருது சமீபத்தில் நியூயார்க்கில் வழங்கப்பட்டது. அதை அமெரிக்காவில் வசித்து வரும் மும்பையை சேர்ந்த பரீத் ஜகாரியா, மீரா நாயரிடம் இருந்து பெற்றுக்கொண்டார். ஜகாரியா தற்போது நியூஸ்வீக் இன்டர்நேஷனல் பத்திரிகையில் ஆசிரியராக இருக்கிறார்.

சிறந்த பத்திரிகையாளரான ஜகாரியா சமீபத்தில் எழுதிய 'த போஸ்ட் அமெரிக்கன் வேல்ர்டு' என்ற புத்தகம் வசூலில் கலக்கியது. அப்புத்தகம் உலகில் அமெரிக்காவின் ஆதிக்கம் முடிவுக்கு வந்துவிட்டது. மற்ற நாடுகள் எப்படி முன்னேறி வருகின்றன போன்றவைகளை ருசிகரமாக எழுதியுள்ளார்.