உலகின் 5வது பெரிய தோல்வியாளர் சர்தாரி!

இஸ்லாமாபாத்: உலகின் ஐந்தாவது பெரும் தோல்வியாளர் என பாகிஸ்தான் அதிபர் ஆசிப் அலி சர்தாரியை அமெரிக்காவைச் சேர்ந்த பாரின் பாலிஸி இதழ் வர்ணித்துள்ளது.

இதுகுறித்து அந்த இதழ் கூறுகையில், பாகிஸ்தான் அதிபராவதற்கு முன்பே நிறைய கெட்ட பெயரை சம்பாதித்து வைத்திருந்தார் சர்தாரி. அவருடைய மனைவி பெனாசிர் பூட்டோவின் நெருங்கிய நண்பர்கள் பலரும் சர்தாரிக்கு ஆதரவாக ஒருபோதும் இருந்ததில்லை.

தற்போது நிலைமை மேலும் மோசமாகியுள்ளது. பாகிஸ்தான் மக்களில் பெரும்பாலானோரும் கூட சர்தாரிக்கு ஆதரவாக இல்லை.

எதிர்க்கட்சித் தலைவர் நவாஸ் ஷெரீப்புடன் கடும் மோதல் போக்கை மேற்கொண்டுள்ளார் சர்தாரி. அவருடைய கோரிக்கைளை நிறைவேற்றியே ஆக வேண்டும் என்ற நிலைக்குத் தள்ளப்பட்ட பின்னர் அவருடைய பெயர் மேலும் மோசமாக கெட்டுப் போய் விட்டது.

கட்சியின் மீதான தனது கட்டுப்பாட்டைக் காத்தாக வேண்டிய நெருக்கடியில் தற்போது இருக்கிறார் சர்தாரி. இதற்காக அவர் பிரதமர் கிலானியை பதவியிலிருந்து நீக்கக் கூட முயற்சிக்கலாம் என்று அந்த இதழ் சர்தாரிக்குப் பாராட்டுப் பத்திரம் வாசித்துள்ளது.

இந்தப் பட்டியலில் போப்பாண்டவருக்கு 2வது இடம் கிடைத்துள்ளது. உலகுடன் அவருக்கு சற்றும் சம்பந்தமே இல்லாதது போல நடந்து கொள்கிறார் போப் என்று அந்த இதழ் கூறுகிறது. இதுவரை இருந்த போப்புகளிலேயே இவருக்குத்தான் நிறைய தோல்விகள் கிடைத்துள்ளதாகவும் அது கூறுகிறது.

தனது மகளை 25 ஆண்டுகள் தனி அறையில் அடைத்து கொடூரமாக கற்பழித்து வந்த ஆஸ்திரிய தொழிலதிபர் ஜோசப் பிரிட்ஸலுக்கு இப்பட்டியலில் முதலிடம் கிடைத்துள்ளது.

போர்ப்ஸ் இதழின் உலகப் பெரும் கோடீஸ்வரர்கள் பட்டியலுக்கு இந்த பட்டியலில் 12வது இடம் கிடைத்துள்ளது. ஏஐஜியின் எலியட் ஸ்பிட்ஸர் 11வது இடத்திலும், இங்கிலாந்து பிரதமர் கார்டன் பிரவுன் 10வது இடத்திலும், இஸ்ரேல் அரிசயல் தலைவர் நதான்யஹு 9வது இடத்திலும் உள்ளனர்.

அமெரிக்காவின் மிகப் பெரிய பண மோசடியாளரான பெர்னி மடாப் 3வது இடத்தைப் பிடித்துள்ளார்.