வைரமுத்துவுக்கு டாக்டர் பட்டம்: பாரதியார் பல்கலை. வழங்குகிறது!

கவிப்பேரரசு வைரமுத்துவுக்கு கோவை பாரதியார் பல்கலைக்கழகம் கௌரவ டாக்டர் பட்டம் வழங்குகிறது.

வைரமுத்துவின் 30 ஆண்டு கால இலக்கியப் பணிகளைப் பாராட்டி இந்த டாக்டர் பட்டம் வழங்கப்படுகிறது.

வரும் ஏப்ரல் 9-ந் தேதி பல்கலைக்கழகத்தில் நடைபெறும் 24-வது பட்டமளிப்பு விழாவில் கவர்னர் சுர்ஜித்சிங் பர்னாலா, இந்தப் பட்டத்தை வழங்குவார் என பல்கலைக்கழக செய்திக் குறிப்பு தெரிவிக்கிறது.

டாக்டர் பட்டம் வைரமுத்துவுக்குப் புதிதல்ல. ஏற்கனவே தமிழ்நாடு திறந்தநிலை பல்கலைக்கழகமும், மதுரை காமராஜர் பல்கலைக்கழகமும் வைரமுத்துவுக்கு டாக்டர் பட்டங்களை வழங்கி உள்ளன. சமீபத்தில்தான் பெருமைக்குரிய சாஹித்ய சம்மான் விருதினையும் பெற்றார் வைரமுத்து.

இந்தப் பட்டமளிப்பு விழாவில் வைரமுத்துவோடு 47 ஆயிரம் முதுநிலை, ஆராய்ச்சி வகுப்பு மாணவர்களும் பட்டம் பெறுகிறார்கள்.

பல்கலைக்கழகத்தில் சிறப்பிடம் பெற்ற 100 மாணவர்களுக்கு தங்கப் பதக்கமும் பாராட்டுச் சான்றிதழும் வழங்கப்படுகிறது.