ரூ. 85,000க்கு ஏலம் போன கார் பதிவு எண் - 'ஏ.கே.47'
ஜம்மு: ஜம்மு காஷ்மீர் மாநிலத்தில், ஏ.கே.47 என்ற கார் பதிவு எண்ணை முகம்மது ரபீக் மிர் என்பவர் ரூ. 85,000 பணத்திற்கு ஏலம் எடுத்துள்ளார்.
கார், பைக், போன் என எண்களைக் கொண்ட எதுவாக இருந்தாலும் அதில் பேன்சி எண் வேண்டும் என ஒற்றைக் காலில் நிற்பவர்கள் நிறைய பேர்.
இதற்காக சம்பந்தப்பட்டவர்களை தனியாக கவனித்து தங்களுக்குப் பிடித்தமான, ராசியான எண்களை வாங்குவது சகஜமாக நடந்து வருவதுதான்.
இந்த நிலையில் ஜம்மு காஷ்மீர் மாநிலத்தில் ஏ.கே.47 என்ற எண்ணை ஏலம் எடுக்க கடும் போட்டியே நடந்துள்ளது. இறுதியில் அதில் வென்றவர் முகம்மது ரபீக் மிர் என்பவர்.
ஜம்மு காஷ்மீர் பிராந்திய போக்குவரத்து அலுவலகம் இந்த ஏலத்தை நடத்தி ஏ.கே.47 எண்ணை ரூ. 85,000க்கு விற்றுள்ளது.
ஜம்முவில் உள்ள பிராந்திய போக்குவரத்து அதிகாரி ரமேஷ் சந்தர் சர்மா முன்னிலையில் இதற்கான ஏலம் நடந்தது.
பூஞ்ச் மாவட்டத்தைச் சேர்ந்த மிர் ஏ.கே.47 எண்ணை ஏலம் எடுத்தது குறித்து கூறுகையில், ஏ.கே.47 என்ற எண் ஏலத்திற்கு வருவதை அறிந்து அதை எடுக்க தீர்மானித்தேன். அந்த எண் எனக்கு மிகவும் பிடிக்கும் என்பதால் பெரும் தொகை கொடுக்கவும் நான் தயாராக இருந்தேன் என்றார்.
மொத்தம் 35 பேர் ஏ.கே. 47 எண்ணை ஏலம் எடுக்க வந்திருந்தனராம்.
இதற்கு முன்பு 007, 786, 420, 470, 777, 888 ஆகிய எண்களுக்கு கடும் கிராக்கி இருந்ததாம். ஆனால் தற்போது ஏ.கே. வரிசையில் வெளியாகும் பதிவு எண்களுக்கு செம கிராக்கியாம். அதிலும் ஏ.கே.47 என்ற எண்ணுக்குத்தான் 35 பேர் வரை போட்டியிட்டுள்ளனராம்.