தியாகி சத்தியமூர்த்தியின் மகள் லட்சுமி மரணம்
சென்னை: பழம்பெரும் காங்கிரஸ் தலைவர்களில் ஒருவரான, தியாகி எஸ்.சத்தியமூர்த்தியின் மகள் லட்சுமி கிருஷ்ணமூர்த்தி சென்னையில் காலாமானார். அவருக்கு வயது 83.
தீரர் என புகழப்பட்ட தியாகி சத்தியமூர்த்தி, தமிழக காங்கிரஸ் கட்சியின் தளகர்த்தர்களில் ஒருவராக விளங்கியவர். சென்னையில் உள்ள சத்தியமூர்த்தி பவனுக்கு இவரது பெயர்தான் வைக்கப்பட்டுள்ளது.
அவரது மகள் லட்சுமி கிருஷ்ணமூர்த்தி. இவரும் சுதந்திரப் போராட்ட தியாகி ஆவார். பதிப்பாளராகவும், விற்பனையாளராகவும் பணியாற்றி வந்தார்.
1964 முதல் 1970 வரை சட்டமேலவை உறுப்பினராக இருந்துள்ளார். 1977ல் மயிலாப்பூர் தொகுதியில் போட்டியிட்டு தோல்வி அடைந்தார்.
அதன் பின்னர் புத்தக உலகில் தனது முழு கவனத்தையும் திருப்பினார். சென்னையில் வாசகர் வட்டம், புத்தக கிளப் ஆகியவற்றை உருவாக்கினார்.
பாலமந்திர், சத்யமூர்த்தி உயர்நிலைப் பள்ளி உள்ளிட்ட பல்வேறு பள்ளிகளுடன் நெருங்கிய ஈடுபாடு கொண்ட லட்சுமி கிருஷ்ணமூர்த்தி, கல்லூரி ஒழுங்குமுறை குழுவில் உறுப்பினராகவும் செயல்பட்டுள்ளார்.
நேற்று அவர் உடல் நலக்குறைவால் மரணமடைந்தார். அவரது மறைவுக்கு காங்கிரஸ் தலைவர் தங்கபாலு இரங்கல் தெரிவித்துள்ளார்.