ஐஏஏ-முதல் அமெரிக்கர் அல்லாத தலைவரானார் மாதவன் நாயர்

பானாஜி: சர்வதேச ஏரோனாடிக்ஸ் அகாடமியின் (ஐஏஏ) தலைவராக இஸ்ரோ தலைவர் மாதவன் நாயர் தேர்வு செய்யப்பட்டுள்ளார்.

இப்பதவிக்கு வரும் அமெரிக்கர் அல்லாத முதல் நபர் என்ற பெருமையையும் அவர் பெற்றுள்ளார்.

இன்று கோவா மாநில தலைநகர் பானாஜியில் குறைந்த செலவில் ராக்கெட் அனுப்புவது தொடர்பான விஞ்ஞானிகள் கூட்டம் நடந்தது.

இதில் சர்வதேச ஏரோனாடிக்ஸ் அகாடமி பொது செயலர் ஜெஎம் கான்டென்ட் கலந்து கொண்டார். அப்போது அவர் பேசுகையில்,

மாதவன் நாயர் தபால் ஓட்டு முறை நடத்தப்பட்ட தேர்தல் மூலம் சர்வதேச ஏரோனாடிக்ஸ் அகாடமியின் தலைவராக தேர்வு செய்யப்பட்டுள்ளார். அவர் வரும் 2011ம் ஆண்டு வரை இப்பொறுப்பில் இருப்பார் என்றார்.

இதையடுத்து தற்போது சர்வதேச ஏரோனாடிக்ஸ் அகாடமியின் துணை தலைவராக இருக்கும் மாதவன் நாயர் இந்த ஆண்டு இறுதியில் கொரியாவில் நடக்கும் விழாவில் தற்போதைய தலைவர் எட்டுவர்டு ஸ்டோனிடம் இருந்து பொறுப்புகளை பெற்று கொள்வார்.

1960ல் சுவீடனில் துவக்கப்பட்ட இந்த அமைப்பின் தலைவராக இதுவரை அமெரிக்கர்கள் மட்டுமே இருந்துள்ளனர். தற்போது மாதவன் நாயர் அமெரிக்கர் அல்லாத முதல் தலைவராக தேர்வு செய்யப்பட்டுள்ளார்.