46% இந்தியக் குழந்தைகள் ஊட்டச்சத்துக் குறைவால் அவதி - ஆய்வு

லண்டன்: இந்தியாவில் உள்ள 46 சதவீத குழந்தைகள் போதிய ஊட்டச்சத்து இன்மையால் அவதிப்படுகின்றன என்று இங்கிலாந்தைச் சேர்ந்த வளர்ச்சி ஆய்வுக் கழகம் (ஐடிஎஸ்) தெரிவித்துள்ளது.

3 வயது வரையிலான குழந்தைகளே அதிக அளவில் ஊட்டச்சத்துக் குறைபாடு காரணமாக அவதிப்படுவதாகவும், உலகிலேயே ஊட்டச்சத்துக்குறைவு அதிகம் உள்ள குழந்தைகள் உள்ள நாடுகள் வரிசையில் தற்போது இந்தியா 3வது இடத்தில் இருப்பதாகவும் அந்த ஆய்வு தெரிவிக்கிறது.

இந்தியாவின் பொருளாதாரம் வளர்ச்சிப் பாதையில் இருந்தாலும் கூட குழந்தைகளுக்கு ஊட்டச்சத்து நிறைந்த உணவு சரிவர கிடைக்காத நிலை இருப்பதையே இது காட்டுவதாக கூறுகிறார் ஐடிஎஸ்ஸின் இயக்குநர் லாரன்ஸ் ஹேடட்.

இதுகுறித்து அவர் கூறுகையில், இந்தியாவின் பொருளாதாரம் மிகச் சிறப்பான வளர்ச்சியைப் பெற்று வருகிறது. அதேசமயம், ஊட்டச்சத்துக் குறைபாட்டில் இந்தியா 3வது இடத்தில் இருப்பது வியப்பளிக்கிறது, அதிர்ச்சி அளிக்கிறது என்றார்.