17வது கல்யாண நாள்- சிம்பிளாக கொண்டாடிய ஒபாமா, மிஷல்

வாஷிங்டன்: அமெரிக்க அதிபர் பாரக் ஒபாமா மற்றும் மிஷல் தம்பதி தங்களது 17வது கல்யாண நாளை, சனிக்கிழமையன்று மிக எளிமையாகக் கொண்டாடினர். ஒபாமா அதிபர் ஆன பின்னர் அவர்கள் கொண்டாடும் முதல் கல்யாண நாள் இது.

வழக்கமாக தனது திருமண நாளை ஒபாமா ஆடம்பரமாக கொண்டாட மாட்டாராம். அதேபோல அமெரிக்க அதிபராக உள்ள இந்த நிலையிலும் அதேபோலவே எளிமையாக கொண்டாடியுள்ளனர் ஒபாமா - மிஷல் தம்பதியினர்.

ஜார்ஜ்டவுன் அருகே உள்ள ரெஸ்டாரென்ட்டில் இரவு விருந்துடன் தங்களது திருமண நாளை எளிமையாக கொண்டாடியுள்ளனர் ஒபாமா தம்பதியினர்.

இரவு ஏழே முக்கால் மணியளவில் கருப்பு நிற உடையில் ஒபாமா தம்பதி ஹோட்டலுக்கு வந்தது. முதுகு தெரியும்படியான நீளமான கருப்பு நிற டிரஸ்ஸில் வந்திருந்தார் மிஷல். அதேபோல, ஒபாமாவும் கருப்பு நிற டிரஸ்ஸில் காணப்பட்டார்.

கடந்த ஆண்டு சிகாகோ அருகே தங்களது திருமண நாளை ஒபாமா தம்பதியினர் கொண்டாடினர்.

1992ம் ஆண்டு அக்டோபர் 3ம் தேதி ஒபாமா, மிஷல் திருமணம் நடந்தது என்பது குறிப்பிடத்தக்கது.