தஞ்சையை கலக்கிய இட்லி போட்டி

தஞ்சாவூர்: தஞ்சையில் இட்லி தயாரிக்கும் வித்தியாசமான போட்டி நடந்தது. இதில் நூற்றுக்கணக்கான பெண்கள் கலந்து கொண்டு வகை வகையான இட்லிகளைத் தயாரித்து அசத்தினர்.

இட்லி தென்னகத்தின் முக்கிய உணவு என்பது அனைவருக்கும் தெரியும். குறிப்பாக தமிழகத்திலும், கர்நாடகத்திலும் இட்லி இல்லாமல் சிற்றுண்டி முழுமை பெறாது.

பார்க்க தம்மாத்தூண்டாக இருந்தாலும் அனைவரையும் அடிமையாக்கி வைத்துள்ள அட்டகாமான டிஷ் இது.

இந்த நிலையில், இந்திய பயிர் பகுப்பாய்வு தொழில்நுட்ப கழகம் (Indian Institute for Crop Processing Technology - IICPT) என்ற நிறுவனம் இட்லி குறித்த ஆராய்ச்சில் இறங்கியுள்ளது. இதற்காக அந்த நிறுவனம் ஒரு இட்லி அவிக்கும் போட்டியை தஞ்சையில் நடத்தியது.

இதற்கு நூற்றுக்கணக்கான பெண் போட்டியாளர்கள் வந்து குவிந்து விட்டனர். உலக அளவில் இட்லியை மார்க்கெட்டிங் செய்து உலகமயமாக்கும் நோக்கிலேயே இந்த இட்லி போட்டி வைக்கப்பட்டது.

போட்டியில் கலந்து கொண்டவர்கள் இட்லி வைக்கத் தேவையான மாவு உள்ளிட்டவற்றை கொண்டு வந்து கலந்து கொண்டனர். இட்லி சட்டி உள்ளிட்டவற்றையும் அவர்களே கொண்டு வந்தனர்.

போட்டியை சுவாரஸ்யமாக்க பலவிதமான பரிசுகளும் கூட அறிவிக்கப்பட்டிருந்தன.

பரிசைத் தட்டிச் செல்ல வேண்டும் என்பதற்காக பெண்கள் விதம் விதமான இட்லிகளை அவித்து அசத்தினர்.

இதுகுறித்து போட்டியில் கலந்து கொண்ட இல்லத்தரசி கவிதா என்பவர் கூறுகையில், தமிழகத்தின் மிக முக்கிய உணவு இட்லி. இதில் ஆய்வு என்பது பெரும் மகிழ்ச்சி அளிக்கிறது. சர்வதேச அளவுக்கு இட்லி எடுத்துச் செல்லப்படுவது மகிழ்ச்சி தருகிறது.

தரமான இட்லிகளைத் தயாரித்து கொடுக்க ஆர்வமாக உள்ளோம். இதன் மூலம் சர்வதேச தரத்தில் இட்லியை உருவாக்க முடியும் என்றார்.

ஐஐசிபிடி அமைப்பின் இணைச் செயலாளர் அஜீத் குமார் கூறுகையில், இட்லியை தரமாக்க வேண்டிய கட்டம் வந்துள்ளது. இதன் மூலம் நாட்டின் எந்தப் பகுதியிலும் ஒரே தரத்துடன், ஒரே சுவையுடன் விற்பனை செய்ய முடியும்.

இட்லியை பலரும் பல விதமாக தயாரிக்கிறார்கள். ஒரே மாதிரியான தரக்கட்டுப்பாடு இதில் இல்லை. அதை மாற்றி இதற்கும் ஒரு தரத்தை நிர்ணயிப்பதன் மூலம் இந்தியா மட்டுமல்லாது உலக நாடுகளுக்கம் இட்லியை கொண்டு செல்ல முடியும்.

இட்லிக்கு நமது நாட்டில் மிகப் பெரிய மார்க்கெட் உள்ளது. இதை உணர வைக்கவும், தரத்தை உருவாக்கவுமே இந்தப் போட்டி என்றார்.

எண்ணை கலப்பில்லாத தென்னிந்திய உணவு இட்லி என்பது மிக முக்கியமானது. உடலுக்கு எந்தவகையான பக்க விளைவுகளையும் இது ஏற்படுத்தாது, உடல் நலம் குன்றியவர்களுக்கு தமிழகத்தில் பரிந்துரைக்கப்படும் ஒரே உணவு இட்லி என்பதும் முக்கியமானது.

இப்படிப்பட்ட இட்லி சர்வதேச அளவில் மார்க்கெட்டிங் செய்யப்படவுள்ளது என்பது இட்லிப் பிரியர்களுக்கு நிச்சயம் சந்தோஷமான செய்திதான்.