மதுரையில் கக்கன் நூற்றாண்டு விழா-அழகிரி பங்கேற்பு!

மதுரை: முன்னாள் தமிழக அமைச்சர் கக்கன் நூற்றாண்டு விழா வரும் 10ம் தேதி அன்று மதுரையில் கொண்டாடப்படுகிறது. இதில் மத்திய ரசாயன துறை அமைச்சர் அழகிரி கலந்து கொள்கிறார்.

இது குறித்து தமிழக அரசு வெளியிட்டுள்ள அறிக்கையில்,

தமிழக அரசின் சார்பில் தியாகசீலர் கக்கன் நூற்றாண்டு விழா அவரது சொந்த ஊரான மதுரை மாவட்டம், மேலூர் வட்டம், தும்பைபட்டியில் அக்டோபர் 10ம் தேதி காலையில் நடைபெறவுள்ளது.

காலை 9.00 மணிக்கு கலைமாமணி புஷ்பவனம் குப்புசாமி குழுவினரின் நாட்டுப்புற இசை நிகழ்ச்சி நடைபெறுகிறது.

இதனையடுத்து, தமிழக செய்தித்துறை அமைச்சர் பரிதி இளம்வழுதி தலைமையில், ஆதிதிராவிடர் நலத்துறை அமைச்சர் ஆ.தமிழரசி முன்னிலையில் மத்திய இரசாயணம் மற்றும் உரத்துறை அமைச்சர் மு.க.அழகிரி, தியாகசீலர் கக்கன் திருவுருவப் படத்தை திறந்து வைத்து, கக்கன் நூற்றாண்டு நினைவு நுழைவு வாயில் அடிக்கல் நாட்டுகின்றார்.

தமிழக அரசின் செய்தி மக்கள் தொடர்புத் துறை இயக்குநர் காமராஜ் நன்றி கூறுகின்றார்.

இந்த விழாவில் நாடாளுமன்ற, சட்டமன்ற உறுப்பினர்கள், உள்ளாட்சி அமைப்புகளின் பிரதிநிதிகள் மற்றும் அரசு உயர் அதிகாரிகள் மற்றும் அலுவலர்கள் பலர் கலந்து கொள்வார்கள் என அந்த அறிக்கையில் கூறப்பட்டுள்ளது.