லால்குடி ஜெயராமனுக்கு சங்கீத நாடக அகாடமியின் அகாடமி ரத்னா விருது

டெல்லி: பிரபல வயலின் வித்வான் லால்குடி ஜெயராமனுக்கு சங்கீத நாடக அகாடமியின் உயரிய விருதான அகாடமி ரத்னா விருது வழங்கப்பட்டது.

கடந்த செவ்வாய்க்கிழமை நடந்த விழாவில் குடியரசுத் தலைவர் பிரதீபா பாட்டீல் இந்து விருதை வழங்கினார். கடந்த ஆண்டிற்கான பெல்லோஷிப் விருது 6 பேருக்கும், அகாடமி விருது 33 கலைஞர்களுக்கும் வழங்கப்பட்டது.

பிரபல நடிகர் ஸ்ரீராம் லகூ, நடனக் கலைஞர் யாமினி கிருஷ்ணமூர்த்தி, இசைக் கலைஞர் கிஷோரி அமோன்கர் ஆகியோருக்கும்
சங்கீத நாடக அகாடமி பெல்லோஷிப் விருது வழங்கப்பட்டது.

இதில் பிரதமரின் சார்பாக பிரதமர் அலுவலக ராஜாங்க அமைச்சர் பிருதிவிராஜ் சவான் கலந்து கொண்டார்.

லால்குடி ஜெயராமன், யாமினி கிருஷ்ணமூர்த்தி, கம்லேஷ் தத் திருப்பதி, கிஷோரி அமோன்கர் ஆகியோருக்கு அகாடமி விருதுகளில் உயரிய விருதான அகாடமி ரத்னா விருது வழங்கப்பட்டது. அவர்களுக்கு ரூ. 3 லட்சம் ரொக்கம், பட்டயம், பொன்னாடை அளிக்கப்பட்டது.

கடந்த மாதம் 17-ம் தேதி தான் ஜெயராமன் தனது 80-வது பிறந்தநாளைக் கொண்டாடினார் என்பது குறிப்பிடத்தக்கது.