இயல் இசை நாடக மன்றத்தில் 'கலைஞர் திரையரங்கம்'!
சென்னை கிரீன்வேஸ் சாலையில் இயங்கும் தமிழ்நாடு இயல் இசை நாடக மன்றத்தில் புதிய இலவச தியேட்டர் திறக்கப்படுகிறது.
ரூ.5 லட்சம் செலவில் தமிழக அரசால் கட்டப்பட்டுள்ள இந்த மினி தியேட்டருக்கு கலைஞர் திரையரங்கம் என பெயரிடப்பட்டுள்ளது.
வருகிற 20-ந்தேதி கனிமொழி எம்.பி. இந்த தியேட்டரை திறந்து வைக்கிறார்.
இந்த தியேட்டரில் 30 முதல் 40 பேர் வரை உட்கார்ந்து பார்க்கலாம். சர்வதேச தரத்தில் ஒலியமைப்பு வசதிகள் செய்யப்பட்டுள்ளன.
பிரபலமான ஆங்கில, தமிழ் திரைப்படங்கள் இங்கு திரையிடப்பட உள்ளன.
இதுபற்றி இயல் இசை நாடக மன்ற செயலாளர் கவிஞர் இளையபாரதி கூறுகையில், "கலைஞர் திரையரங்கம் சர்வதேச தரத்துடன் கூடிய ஒருஆடியோ வீடியோ லைப்ரரி. பிரபலமான 1000 ஆங்கிலப்பட வீடியோக்களை சேகரித்து வைத்துள்ளோம். தமிழ் படங்களில் சிறந்த படங்களை தேர்வு செய்து வைத்துள்ளோம்.
குறிப்பாக பழைய படங்களான கண்ணகி, ஸ்ரீவள்ளி, கலைஞரின் பராசக்தி, மனோகரா, ராஜாராணி, ஜெயகாந்தனின் சிலநேரங்களில் சில மனிதர்கள் போன்ற முக்கிய படங்களின் சி.டி.க்களை வைத்து இருக்கிறோம்.
எழுத்தாளர்கள், பத்திரிகையாளர்கள், நடிகர்- நடிகைகள் போன்றோர் ஏதேனும் படத்தைப் பார்க்க விரும்பினால் அவர்களுக்கு திரையிட்டு காண்பிக்கப்படும்.
இதற்கு கட்டணம் வசூலிக்கப்பட மாட்டாது. இலவசமாகவே பார்க்கலாம்.
உலக சினிமாக்கள், இந்திய சினிமாக்கள், தமிழ் சினிமாக்கள், ஆவண படங்கள் என 4 வகையாக வரிசைப்படுத்தி இப்படங்களை வைத்துள்ளோம்.
அதோடு முக்கியமான இசையமைப்பாளர்களின் இசை ஆல்பங்களையும் இங்கு பார்க்கலாம். புதிய பாடகர்களின் பாடல்களை கேட்டு ரசிக்கலாம்.
முக்கிய பிரமுகர்களை சேர்த்து மூவி கிளப் ஒன்றையும் விரைவில் தொடங்க உள்ளோம்..." என்றார் அவர்.