திருமலை ஊழியர்களுக்கு சனிக்கிழமை மட்டும் ஸ்பெஷல் சீருடை!

திருப்பதி திருமலை: திருமலையில் பணியாற்றும் அனைத்து ஊழியர்களும் சனிக்கிழமை மட்டும் புதிய உடை அணிய வேண்டும் என்று உத்தரவிடப்பட்டுள்ளது.

திருமலை திருப்பதி தேவஸ்தான அறங்காவலர் குழு கூட்டம் கடந்த வாரம் நடந்தது. சனிக்கிழமைஏழுமலையானுக்கு உகந்த நாள் என்பதால் சனிக்கிழமை தோறும் திருப்பதி தேவஸ்தான ஊழியர்கள் வெள்ளை வேட்டி- சட்டை அணிந்து வரவேண்டும் என்றும் பெண் ஊழியர்கள் சேலை அணிந்து வரவேண்டும் என்றும் உத்தரவிடப்பட்டது.

இந்த புதிய சீருடை உத்தரவு நேற்று (சனிக்கிழமை) முதல் அமலுக்கு வந்தது. இதையடுத்து நேற்று திருப்பதி திருமலை தேவஸ்தான ஊழியர்கள் அனைவரும் வெள்ளை வேட்டி- சட்டை அணிந்து பணிக்கு வந்தனர்.

இதேபோல் பெண் ஊழியர்கள் சேலை அணிந்து வரவேண்டும் என்று உத்தரவிடப்பட்டதால் நேற்று பெரும்பாலான பெண் ஊழியர்கள் சேலை கட்டி வந்திருந்தனர்.

இதையும் மீறி சில பெண் ஊழியர்கள் சுடிதார் மற்றும் இதர உடைகளில் வந்திருந்தனர். அவர்கள் பணிபுரிய தடை விதித்து வீட்டுக்கே திருப்பி அனுப்பப்பட்டனர்.