குன்னூர் - மேட்டுப்பாளையம் ரயில் மீண்டும் இயக்கம் !

குன்னூர்: நிலச்சரிவால் பாதிக்கப்பட்ட குன்னூர் - மேட்டுப்பாளையம் ரயில் பாதையில் மீண்டும் ரயில் போக்குவரத்து துவங்கியது.

நீலகிரியில் கடந்தாண்டு நவம்பர் 7 ம் தேதி துவங்கி 10 ம் தேதி வரை வரலாறு காணாத மழை கொட்டி தீர்த்தது.

இதன் காரணமாக ஊட்டி - மேட்டுப்பாளையம் மலை ரயில் பாதையில் பல இடங்களில் நிலச்சரிவு ஏற்பட்டு, ரயில் பாலங்கள் சேதம் அடைந்தது.

இதனையடுத்து, ரயில் பாதை சீரமைப்புப் பணி நிறைவு பெற்று, கடந்த ஜனவரி 5 ம் தேதி குன்னூர் - ஊட்டி இடையே ரயில் போக்குவரத்து துவங்கியது.

இந்த நிலையில், மேட்டுப்பாளையம் - குன்னூர் ரயில் பாதை சீரமைப்புப் பணி நிறைவு பெற்றதை அடுத்து ரயில் போக்கு வரத்தை தெற்கு ரயில்வே பொது மேலாளர் தீபக் கிருஷன் துவக்கி வைத்தார்.

தற்போது கோடை காலம் என்பதால் தமிழகத்தின் பல பகுதிகளில் இருந்தும் பலர் ஊட்டி , குன்னூருக்கு சுற்றுலா வந்த வண்ணம் உள்ளனர்.

மேலும் அவர்கள் மலை ரயில் மூலம் இயற்கை அழகை பார்த்துக் கொண்டே செல்ல மலை ரயில் போக்கு வரத்து துவக்கப்பட்டதன் மூலம் சுற்றுலா பயணிகள் உற்சாகம் அடைந்துள்ளனர்.