தாய்மார்களுக்கு இந்தியா மகிழ்ச்சிகரமான இடம் இல்லை - ஆய்வு

டெல்லி: உலகம் முழுவதும் இன்று அன்னையர்கள் தினம் கொண்டாடப்பட்டு வரும் வேளையில், இந்தியா தாய்மார்களுக்கு மகிழ்ச்சிகரமான நாடாக இல்ல என்று ஒரு ஆய்வுத் தகவல் கூறுகிறது.

நடுத்தர வருவாயினரை அதிகம் கொண்ட நாடுகள் மத்தியில், தாய்மார்களுக்கான சுகாதாரம் மற்றும் நலன்கள் இந்தியாவில் மிகவும் மோசமாக உள்ளதாம்.

மொத்தம் உள்ள 77 நாடுகளில் 73வது இடம் இந்தியாவுக்குக் கிடைத்துள்ளது. சேவ் தி சில்ட்ரன் என்ற சிறார் உரிமைக் கழகம் நடத்திய ஆய்வு முடிவில்தான் இவ்வாறு கூறியுள்ளனர்.

இதை விட அதிர்ச்சிகரமாக மிகவும் வறுமையில் உழலும் காங்கோ, கென்யாவை விட இந்தியாவில் நிலைமை மோசமாக இருப்பதாகவும் அது கூறியுள்ளதுதான் பெரும் ஆச்சரியத்தை அளிக்கிறது.

தாய்மார்களுக்கான சிறந்த நாடாக் கியூபா தேர்வு செய்யப்பட்டுள்ளது. இஸ்ரேல், அர்ஜென்டினா, பார்படோஸ், தென் கொரியா, சைப்ரஸ், உருகுவே, கஜகஸ்தான், பஹாமஸ், மங்கோலியா ஆகியவை அடுத்தடுத்த இடங்களில் உள்ளன.

சீனாவுக்கு 18வது இடமும், இலங்கைக்கு 40வது இடமும், பாகிஸ்தானுக்கு 75வது இடமும் கிடைத்துள்ளன.

மிகவும் வளர்ச்சி குறைந்த நாடுகள் பட்டியலில் இடம் பெற்றுள்ள வங்கதேசத்திற்கு அதில்14வது இடம் கிடைத்துள்ளது.