கூகுள் சர்ச்: அதிகம் தேடப்பட் தொழிலதிபர்கள் விஜய், சித்தார்த் மல்லையா

டெல்லி: இந்தியாவின் நம்பர் ஒன் பணக்காரராக முகேஷ் அம்பானி இருக்கலாம். முன்னணி இடத்தில் அனில் அம்பானி இருக்கலாம். அவர்களது குடும்பத்தினர் அனைத்திலும் முன்னணியில் இருக்கலாம். ஆனால் கூகுள் சர்ச்சில், அவர்களை ஓரம் கட்டி முதலிடத்தைப் பிடித்துள்ளனர் கர்நாடகத்தின் விஜய் மல்லையா மற்றும் அவரது மகன் சித்தார்த் மல்லையா ஆகியோர்.

கூகுளில் அதிகம் தேடப்பட்ட தொழிலதிபர்கள் இவர்கள்தானாம். 2010ம் ஆண்டு கூகுள் சர்ச் தளத்தில் அதிகம் தேடப்பட்ட தொழிலதிபர் விஜய் மல்லையாதான்.

அடுத்த இடத்தைப் பிடித்திருப்பவர் அவரது மகன் சித்தார்த் மல்லையா. இவருக்கும், நடிகை தீபிகாவுக்கும் இடையே காதல் இருப்பதாக வெளியான செய்தியைத் தொடர்ந்து சித்தார்த்தும் நாடறிந்த பிரபலமாகி விட்டார். மேலும் ஐபிஎல் போட்டியின்போது இவரும், தீபிகாவும் அருகருகே நின்று 'வதந்தி வாய்களை' நிரப்பி வந்தனர் என்பது நினைவிருக்கலாம்.

அதற்குப் பிறகுதான் அம்பானிகள் வருகின்றனர். 3வது இடத்தை முகேஷின் மனைவி நீதா அம்பானி பெற்றுள்ளார். நான்காவது இடத்தில் முகேஷும், 5வது இடத்தில் தம்பி அனில் அம்பானியம் உள்ளனர்.

ரத்தன் டாடாவையும் நிறையப் பேர் தேடியுள்ளனர். ஆனால் நீரா ராடியா டேப் விவகாரத்தில் ரத்தன் பெயர் அடிபட்டதால் அடித்துப் பிடித்து இவரையும் தேடியுள்ளனர். ரத்தனை நவம்பர் 30ம் தேதி முதல் டிசம்பர்6ம் தேதி வரை அதிக அளவிலானோர் தேடியுள்ளனர்.

பிற பிரபலங்கள் வரிசையில் அதிகம் தேடப்பட்டவர் காத்ரீனா கைப்தான். சச்சின் டெண்டுல்கரையும் கூட இதில் பின்னுக்குத் தள்ளியுள்ளார் காத்ரீனா. இவரைத்தான் அதிக அளவிலானோர் வலையுலகில் தேடிப் பார்த்துள்ளனர். யாஹூவிலும் கூட காத்ரீனாதான் முதலிடத்தைப் பிடித்துள்ளார்.

யாஹூ சர்ச் தளத்தில், முக்கியத் தலைப்புச் செய்தியாக, அயோத்தி பிரச்சினையைதான் அதன் வாடிக்கையாளர்கள் பெருமளவில் தேடியுள்ளனர். அதேசமயம், கூகுள் மற்றும் யாஹூவில் அதிகம் தேடப்பட்ட வார்த்தை ஐபோன்.

யூடியூபில் அதிகம் பார்க்கப்பட்ட வீடியோ சச்சின் டெண்டுல்கர் குவாலியர் ஒரு நாள் போட்டியில் போட்ட இரட்டை சதமாகும். அடுத்த இடம் மைக்கேல் ஜாக்சனுக்கும், 3வது ஐபிஎல்3 போட்டிகளுக்கும் கிடைத்துள்ளது.

English summary

Vijay Mallya was the most searched business personality on Google in 2010, followed by son Sidharth Mallya and Mukesh Ambani’s betterhalf, Nita Ambani. The huge popularity of IPL 3 was the main reason behind all of them being clicked more often on Google.