குற்றாலத்தில் சீசன் ஜூனில் துவங்க அறிகுறி

குற்றாலம்: தென்காசியில் கடந்த இரண்டு தினங்களாக தென்மேற்கு பருவ காற்று வீசத் துவங்கியுள்ளதால் வெயிலின் தாக்கம் சற்று குறைந்துள்ளது. இதனால் சீசன் ஜூன் முதல் வாரத்தில் துவங்கும் அறிகுறி தெரிகிறது.

குற்றாலம், செங்கோட்டை பகுதிகள் மேற்கு தொடர்ச்சி மலை அடிவாரத்தில் அமைந்துள்ளது மட்டுமின்றி மேற்கு தொடர்ச்சி மலையின் முதன்மையான ஆரியங்காவு கனவாய்க்கு நேராக அமைந்துள்ளது. இதனால் தமிழகத்தின் பெரும்பாலான பகுதிகளில் வெயிலில் வாட்டி எடுக்கும் கோடை காலத்தில் கூட தென்காசி, குற்றாலம் பகுதியில் வெயிலின் தாக்கம் தெரியாத அளவுக்கு இதமான காற்று வீசும்.

தற்போது தமிழகத்தின் பிற பகுதிகளில் கத்தரி வெயில் வாட்டி வரும் நிலையில் குற்றாலத்தில் கடந்த இரண்டு தினங்களாக மிதமான காற்று வீசத் தொடங்கியுள்ளது.

இதனால் வெயிலின் தாக்கம் சற்று குறைந்துள்ளது. தென்மேற்கு பருவ மழை துவங்குவதற்கு அறிகுறியாக பருவகாற்று வீசத் துவங்கியுள்ளதால் இந்த ஆண்டு குற்றால சீசன் ஜூன் முதல் வாரத்தில் துவங்கும் என எதிர்பார்க்கப்படுகிறது.

சீசனுக்கு அறிகுறியாக கேரளாவில் மெல்லிய சாரல் பெய்வது குறிப்பிடத்தக்கது.