இந்தியாவில் சிறந்த நகரங்கள்-3வது இடத்தில் சென்னை

டெல்லி: இந்தியாவிலேயே மக்கள் வாழ்க்கை நடத்துவதற்கு டெல்லியே சிறந்த நகரமாக கருதப்படுகிறது.

இந்தியாவில் வாழ்க்கை நடத்த சிறந்த நகரங்களின் 2010ம் ஆண்டுக்கான பட்டியலை மத்திய ஊரக மேம்பாட்டுத் துறை செயலாளர் ராமச்சந்திரன் டெல்லியில் நேற்று வெளியிட்டார்.

இந்திய தொழில் கூட்டமைப்பு (சிஐஐ) மற்றும் இந்திய போட்டி நிர்வாக கல்வி நிறுவனம் இணைந்து இந்த பட்டியலை உருவாக்கியுள்ளன.

நிலப் பகுதி, கல்வி, பாதுகாப்பு, சுகாதாரம், மருத்துவ வசதிகள், தரம், இருப்பிட வசதிகள், கட்டமைப்பு வசதிகள், சமூக கட்டமைப்பு, அரசியல் சூழல், பொருளாதார நிலைமை, இயற்கை அமைப்பு என பல்வேறு அம்சங்களின் அடிப்படையில் இந்தியாவின் 37 நகரங்களில் இக்குழுவினர் ஆய்வு மேற்கொண்டனர்.

ஆய்வுக்குப் பின், மக்கள் வாழத்தகுந்த சிறந்த நகரங்களை வரிசைப்படி பட்டியலிடப் பட்டன.

இந்த பட்டியலில் டெல்லி முதலிடத்தை பிடித்துள்ளது. இரண்டாவதாக மும்பை உள்ளது. மூன்றாவது இடத்தில் சென்னையும் அதைத் தொடர்ந்து முறையே பெங்களூர், ஹைதராபாத், புனே ஆகிய நகரங்கள் உள்ளன.

இந்த பட்டியலில் கடைசி இடத்தை ஜெம்ஷெத்பூர் பெற்றுள்ளது. லக்னோ, பாட்னா, விசாகபட்டினம், லூதியானா ஆகிய நகரங்கள் இந்த பட்டியலில் கடைசி இடங்களில் உள்ளன.

சமூக அரசியல் சூழ்நிலைகளைப் பொருத்தவரையில் மும்பை முதலிடத்தில் உள்ளதாக ஆய்வில் கூறப்படுகிறது.

பாதுகாப்பு விஷயத்தில் டெல்லி முதலிடத்திலும், குர்குவான் மற்றும் நொய்டா நகரங்கள் மிக மோசமானவை என்றும் கருதப்படுகின்றன.