மது-புகையிலைக்காக செலவு செய்வதில் இந்தியாவிலேயே கேரளா முதலிடம்

கொல்லம்: இந்தியாவிலேயே மது, புகையிலை உள்பட போதை பொருளுக்கு பணம் செலவிடுவதில் கேரளா முதலிடத்தை பிடித்துள்ளது.

தேசிய மாதிரி ஆய்வு நிறுவனம் கடந்த 2007-08ம் ஆண்டு இந்தியா முழுவதும் ஒவ்வொரு குடிமகனும் செலவழிக்கும் செலவு விபரங்கள் தொடர்பாக நடத்திய ஆய்வு குறித்த தகவல்களை திருவனந்தபுரத்தில் வெளியிட்டது.

இதை வெளியிட்டு மத்திய புள்ளியியல் துறை துணை இயக்குனர் ஜெனரல் சிஆர்கே நாயர் கூறுகையில்,

இந்தியாவில் செலவு செய்வதிலும், பயன்பாட்டிலும் கேரளா முதலிடத்தில் உள்ளது. புகையிலை, மது உள்பட போதை பொருட்களுக்காக கேராளவை சேர்ந்தவர்கள் மற்ற மாநிலத்தில் உள்ளவர்களை விட 3 மடங்கு அதிகமாக செலவிடுகின்றனர்.

போதை பொருட்களுக்காக இந்தியாவில் நகர்ப்புறங்களில் ஓருவர் மாதத்திற்கு சராசரியாக 7 ரூபாயும், கிராமப்பகுதிகளில் 6 ரூபாயும் செலவு செய்கின்றனர். கேரளாவில் ஒருவர் நகர்புறங்களில் 19 ரூபாயும், கிராமப்புறங்களில் 17 ரூபாயும் செலவு செய்கின்றனர்.

சராசரியாக இந்தியாவில் நகரம், மற்றும் கிராமத்தில் போதை பொருட்களுக்கு செலவிடுவதை விட 3 மடங்கு அதிகமாக கேரளாவில் ஒருவர் செலவிடுகிறார்.

கேரளாவில் கிராமத்தில் ஆகும் செலவு மற்ற மாநிலங்களில் நகரங்களில் ஆகும் செலவுக்கு இணையாக உள்ளது. இதுபோல் கேரளாவில் நகரங்களில் ஆகும் செலவு இந்தியாவில் உள்ள மெட்ரோ நகரங்களில் ஆகும் செலவுக்கு சமமாகும்.

கேரளாவில்தான் கல்விக்கான செலவும் மற்ற மாநிலங்களை விட அதிகமாக உள்ளது. ஒரு மாணவனுக்கு கேரளாவில் ஒரு வருடத்திற்கு ஆகும் செலவு விபரம், டியூசன் கட்டணம்-1919, தேர்வு கட்டணம்-427, புத்தகங்கள் மற்ற செலவு-831, சீரூடை-457, போக்குவரத்து-655, தனியார் டியூசன்-444, மொத்த செலவு-4895.

புகையிலை பயன்படுத்துவதிலும் கேரளாவுக்கு தான் முதலிடம். கேரள கிராமத்தில் இதற்கு ஆகும் செலவு ரூ.15. நகரங்களில் ஆகும் செலவு 19. ஆனால் தேசிய சராசரி கிராமத்திலும், நகரத்திலும் 10 ரூபாய் மட்டுமே செலவிடப்படுகிறது என்றார் நாயர்.