வருமா அந்த மழைக்காலம்!

என்னுடன் பேச உனக்கு பயம்
உன்னுடன் பேச எனக்கு தயக்கம்

பயத்தையும் தயக்கத்தையும்
ஒரு கல்லூரி ஸ்ட்ரைக் பிற்பகலில்
ஒன்றாய் சந்திக்க வைத்தது, ஒரு மழை மேகம்!

பம்ப்செட் ரூம் நெருக்கடியில்
தோழியின் சடை மறைவில்
ஒளிந்து பார்த்த உன் கண்கள்...

வெளியே மழை...
மனசுக்குள் ஆறாய் சந்தோஷ வெள்ளம்
மழை விடவேயில்லை!

இருள் வரும் நேரம்...
உன் பதட்டம் எனக்குள் கல்லெறிய
வேகமாய் ஓடினேன்...
உனக்குக் குடை கொண்டுவர

தெரிந்த வீட்டில் வாங்கி
வீரனைப் போல் உன்முன் நின்று
குடைநீட்டும் நேரம்
மழை சட்டென விட்டுப் போனது...

எனக்குப் பிடித்த மழையை
அளவுக்கதிமாய் திட்டிய ஒரே பொழுது
அந்த சாயங்காலம்தான்!