சுழற் பந்துவீச்சாளர் பிரக்யான் ஓஜாவுக்கு மே 16ல் கல்யாணம்

புவனேஸ்வரம் இந்திய கிரிக்கெட் அணியின் சுழற்பந்து வீச்சாளர் பிரக்யான் ஓஜாவுக்கு திருமணம் நிச்சயமாகியுள்ளது. மே 16ம் தேதி புவனேஸ்வரத்தில் வைத்து திருமணம் நடைபெறுகிறது.

இடது கை சுழற்பந்து வீச்சாளரான ஓஜா, சமீபத்தில முடிவடைந்த ஐபிஎல் தொடரில் சிறப்பாக பந்து வீசி அதிக விக்கெட்களைக் கைப்பற்றி சாதனை படைத்தார். ஹைதராபாத் டெக்கான் சார்ஜர்ஸ் அணியில் இடம் பெற்றுள்ளார் ஓஜா.

அவருக்குத் திருமணம் நடைபெறவுள்ளது. மே 16ம் தேதி புவனேஸ்வரத்தில் நடைபெறும் திருமணத்தில் பிஎச்டி ஆய்வுப் படிப்பை படித்து வரும் மேரி கராபியை மணக்கிறார் ஓஜா.

இது காதல் திருமணமாகும். 2 வருடங்களுக்கு முன்பு கராபியை சந்தித்துள்ளார் ஓஜா. பார்த்தவுடன் காதல் மலர்ந்து விட்டதாம். இதையடுத்து தனது குடும்பத்தாரிடம் தகவலைத் தெரிவிக்க அவர்களும் சம்மதம் தெரிவிக்க தற்போது திருமணம் மூலம் இரு மணங்களும் இணைகின்றன.

இதுகுறித்து ஓஜாவின் தாயார் பித்யுத்லதா கூறுகையில், எனக்கு மகிழ்ச்சியாக உள்ளது. 2 வருடங்களாக கராபியுடன் பழகியுள்ளான் ஓஜா. பின்னர் என்னிடம் அறிமுகப்படுத்தினான். எனக்கும் கராபியைப் பிடித்து விட்டது என்றார் பூரிப்புடன்.

கராபியின் தந்தை பேராசிரியர் கைலாஷ் சந்திர பரால். தாயார் சன்சலா நாயக் பராலும் ஒரு பேராசிரியைதான். பரோடாவில் உள்ள எம்.எஸ். பல்கலைக்கழகத்தில் எம்.எஸ்சி பயோகெமிஸ்ட்ரி முடித்துள்ள கராபி, ஹைதராபாத் மத்திய பல்கலைக்கழகத்தில் தற்போது பிஎச்டி செய்து வருகிறார்.

ஓஜாவும் ஹைதராபாத் ரஞ்சி அணிக்காகவும், டெக்கான் சார்ஜர்ஸுக்காவும் ஆடி வருகிறார் என்பது குறிப்பிடத்தக்கது.