2011 பத்ம விருதுகள்: எம்எஸ்வி, டிஎம்எஸ் உள்பட 1303 பேர் பரிந்துரை

Updated: Monday, April 15, 2013, 10:27 [IST]

Subscribe to Oneindia Tamil

டெல்லி: நாட்டின் உயர்ந்த சிவிலியன் விருதுகளான பத்மஸ்ரீ, பத்மபூஷன், பத்ம விபூஷன் ஆகியவற்றுக்கு இந்த ஆண்டு பல்வேறு துறைகளைச் சேர்ந்த1303 பேர் பரிந்துரைக்கப்பட்டுள்ளனர்.

இந்த பரிந்துரைப் பட்டியலை இன்று வெளியிட்டது மத்திய உள்துறை அமைச்சகம்.

அதில், பிரபல நடிகர் மம்முட்டி, தமிழகத்தைச் சேர்ந்த இசையமைப்பாளர் எம்எஸ்விஸ்வநாதன், மூத்த பின்னணி பாடகர் டிஎம் சவுந்திரராஜன், நடிகர்கள் ஒய் ஜி மகேந்திரன், சிவகுமார், எஸ்வீ சேகர், மூத்த நடிகை எம்என் ராஜம், இசைக் கலைஞர் சுதா ரகுநாதன், தமிழறிஞர் அவ்வை நடராஜன், முன்னாள் டென்னிஸ் வீரர் விஜய் அமிர்தராஜ் உள்பட பலரும் இந்த விருதுகளுக்குப் பரிந்துரைக்கப்பட்டுள்ளனர்.

இந்தி நடிகர்கள் ஜெயப்பிரதா, சல்மான்கான், பிரியங்கா சோப்ரா ஆகியோரும் இந்த விருதுகளுக்குப் பரிந்துரை செய்யப்பட்டுள்ளனர்.

வரும் ஜனவரி 26-ம் தேதி குடியரசு தினத்தன்று பத்ம விருதுகள் அறிவிக்கப்பட உள்ளன.

இந்த பரிந்துரைப் பட்டியலில் உத்தரகண்ட் முதல்வர் ரமேஷ் போக்ரியால் பெயரும் இடம்பெற்றுள்ளது. இலக்கிய பணிக்காக இந்த விருதுக்கு அவரது பெயர் சிபாரிசு செய்யப்பட்டுள்ளது.