பட்டாசும் பலகாரமும் இல்லாத தீபாவளியை நினைத்துக் கூட பார்க்க முடியாது…

By Mayura Akilan

Published: Monday, October 28, 2013, 14:38 [IST]

Subscribe to Oneindia Tamil

பண்டிகை நாளில் அதிகாலையில் எழுந்து குளித்து முடித்து புத்தாடை அணிந்து பட்டாசு வெடித்த கையோடு பலகாரத்தட்டும் கையுமாக டிவி பார்க்க அமர்ந்து விடுகின்றனர் வாண்டுகள். பெரியவர்கள் ஒரு குலோப் ஜாமுன்... கொஞ்சம் அல்வா... ஒரு மைசூர் பாகு என ருசித்து கலோரியை அதிகரித்துக் கொள்வார்கள்.

உலக அளவில்இந்தியாவில்தான் அதிக அளவிலான சர்க்கரை நோயாளிகள் இருக்கின்றனர். இது 20 ஆண்டுகளில் 150 சதவிகிதம் அதிகரிக்க வாய்ப்புள்ளது என்கின்றனர் மருத்துவர்கள்.

இந்தியாவில் மாம்பழ சீசன் சமயத்திலும், தீபாவளி பண்டிகை காலத்திலும்தான் சர்க்கரை நோயாளிகள் இருமடங்கு அதிகரிக்கின்றனர் என்கின்றது ஒரு சர்வே. தீபாவளி பலகாரத்தில் எந்த பலகாரத்தில் கலோரி எந்த அளவு இருக்கிறது என்றும் பட்டியலிட்டுள்ளனர் படியுங்களேன்.

லட்டு, ஜிலேபி, அல்வா

தீபாவளி இனிப்புகளில் முக்கிய இடம் வகிப்பது லட்டு, ஜிலேபி, அல்வாதான். இந்த இனிப்புகளை சாப்பிடும் முன் இதன் கலோரிகளை தெரிந்து கொள்ளுங்கள்.

ஒரு ஜிலேபியில் 150 கலோரிகளும், ஒரு லட்டுவில் 153 கலோரிகளும், ஒரு பீஸ் அல்வாவில் 82 கலோரிகளும் இருக்கின்றனவாம்.

மைசூர் பாகு

இப்போது நெய் சொட்ட சொட்ட வாயில் வைத்தாலே கரையும் அளவிற்கு மைசூர் பாகு கிடைக்கிறது. சுகராவது ஒன்றாவது கொஞ்சம் சாப்பிடுவோம் என்று ஒரு பீஸ் அள்ளி விழுங்கினால் போச்சு ஒரு பீஸ் மைசூர் பாகில். 357 கலோரி இருக்கிறதாம்.

குளோப் ஜாமுன்

பண்டிகை வந்தாலே குலோப் ஜாமுன் செய்யாமல் இருக்கமாட்டார்கள். ரெடி மிக்ஸ் வாங்கி செய்து சர்க்கரையை கிலோ கணக்கில் போட்டு பாகு காய்ச்சி வைத்து ஊறப்போட்டு விடுவார்கள். போக வர ஒன்றொன்றாக சாப்பிட்டு கொண்டாடுவார்கள் பண்டிகையை ஒரு குலோப் ஜாமுனில் 387 கலோரிகள் இருக்கிறதாம்.

ரசகுல்லா

குலோப் ஜாமுன் போல ரசகுல்லாவிற்கும் பெரும்பாலோனோர் அடிமையாகியிருப்பார்கள். ஒரு பீஸ் ரசகுல்லாவில் 125 கலோரிகள் உண்டாம்.

தேங்காய் பர்பி

முந்திரி பர்பி, தேங்காய் பர்பி போன்றவைகளை வீட்டில் செய்வது எளிது. ஒரு பீஸ் கடலை பர்பியில் 81 கலோரிகள் இருக்கிறதாம்.தேங்காய் பர்பியில் 192 கலோரிகள் இருக்கிறது என்கின்றனர் நிபுணர்கள்.

கொஞ்சமா சாப்பிடுங்க…

எண்ணெய் பலகாரமோ, இனிப்போ எது சாப்பிட்டாலும் அளவோடு சாப்பிடுங்கள்... சந்தோசமாக சர்க்கரை இன்றி தீபாவளியை கொண்டாடுங்கள் என்கின்றனர் நிபுணர்கள். கலோரியைப் போட்டு பயமுறுத்தினாலும்..,, ஸ்வீட் என்ன விலை விற்றாலும் நம்ம மக்கள் வாங்கி சாப்பிடத்தானே போகின்றனர் என்கிறீர்களா? சரி விடுங்க ஒருநாள் தானே!

Published On October 28, 2013