அமெரிக்காவில் குழந்தைகள் தின விழா கோலாகலம்... ஆடல், பாடல், பேஷன் ஷோ!

ஹூஸ்டன்: அமெரிக்காவின் டெக்சாஸ் மாகாணத்தில் உள்ள ஹூஸ்டன் நகரில் தமிழ்நாடு அறக்கட்டளை என்ற பெயரில் தொண்டு நிறுவனம் செயல்பட்டு வருகிறது. இந்த தனியார் தொண்டு நிறுவனத்தின் கிளை அமெரிக்காவில் மட்டுமல்லாமல் சென்னையிலும் உள்ளது.

கடந்த 17ஆம் தேதி, அமெரிக்காவில் உள்ள கிளையில், குழந்தைகள் தினம் விமரிசையாக கொண்டாடப்பட்டது. இந்த விழாவிற்கு சிறப்பு விருந்தினர்களாக இசையமைப்பாளர் மற்றும் பின்னணிப்பாடகரான சத்தியன் மகாலிங்கமும், விஜய் டிவி புகழ் வடிவேல் பாலாஜியும் வந்திருந்தனர். சத்தியன் மகாலிங்கம் பாட்டு பாட அரங்கமே அதிர்ந்தது.

குழந்தைகளுக்கான பேஷன் ஷோவும் நடத்தப்பட்டது. அதே போல், மாத்தி யோசி என்ற நிகழ்ச்சியில் குழந்தைகளுடன் வடிவேல் பாலாஜி உரையாடி விளையாடியது அனைவரையும் கவர்ந்தது.

"நான் ஒருநாள் முதல்வர் ஆனால்" என்ற தலைப்பில் நடத்தப்பட்ட பேச்சு போட்டியில் மாணவர்கள் வெளுத்து வாங்கினர். இறுதியாக குழத்தைகளுக்கு பரிசுகள் வழங்கப்பட்டு, பாராட்டு தெரிவிக்கப்பட்டது.

பின்னர், தமிழ்நாடு அறக்கட்டளையின் தலைவர் திருமதி.மாலா கோபால் பேசியதாவது: தமிழ்நாடு அறக்கட்டளை மூலம் திரட்டப்படும் நிதி தமிழகத்தில் பள்ளிகள் கட்டுவதற்கும், பள்ளிகளுக்கான அடிப்படை வசதிகளை ஏற்படுத்தி தரவும் பயன்படுத்தப்படுகிறது. இந்த தொண்டு தொடருவதற்கு அனைவரது ஒத்துழைப்பும் அவசியம் என்றும் கேட்டுக்கொண்டார்.

English summary

The NGO is based in the city of Houston, texas (USA), this private charity branch is not only in the america, Chennai also. On the 17th, the Children's Day celebrated in the america.