காபி குடிங்க… கல்லீரல் புற்றுநோய் வராதாம்!

By Mayura Akilan

Updated: Thursday, October 24, 2013, 16:53 [IST]

Subscribe to Oneindia Tamil

ரோம்: காலை எழுந்த உடனே கசப்பான காபி சுவை வேண்டும் என்பது பலரது விருப்பம். அப்படிப்பட்ட காபி பிரியர்களை மகிழ்விக்கும் வகையில் வந்துள்ளது புதிய ஆய்வு முடிவு ஒன்று.

தினமும் மூன்று கப் காபி அருந்துவதன் மூலம் கல்லீரல் புற்றுநோயை 50 சதவிகிதம் குறைக்கமுடியும் என்கிறது அந்த ஆய்வு.

காபி பற்றிய சுவையான ஆய்வு முடிவினை மேற்கொண்டு படியுங்களேன்.

மேலும் இது ஈரல் செல்லியல் புற்றுநோய் ஆபத்தை 40 சதவிகிதம் வரை குறைக்கக்கூடும் என்றும் இரைப்பை மற்றும் குடலியல் மருத்துவ அமைப்பின் சார்பில் வெளிவரும் அமெரிக்க மருத்துவ இதழில் தெரிவிக்கப்பட்டுள்ளது.

கல்லீரல் புற்று நோய்

உலகில் தோன்றும் பொதுவான புற்றுநோய்களில் கல்லீரல் புற்றுநோய் ஆறாவது இடத்தைப் பிடிக்கின்றது. மற்றும் இறப்பிற்கான புற்றுநோய் காரணங்களில் இது மூன்றாவது இடத்தைப் பிடிக்கின்றது. இதிலும் ஈரல் செல்லியல் புற்றுநோய் என்பது உலகம் முழுவதிலும் காணப்படும் புற்றுநோயில் 90 சதவிகிதம் காணப்படுவதாகும்.

காபி நல்லது…

நீரிழிவு நோய் கல்லீரல் புற்றுநோய்க்கு ஒரு காரணியாக விளங்கக்கூடும் என்ற நிலையில், காபி குடிப்பது நீரிழிவு நோயைக் குறைக்கும் என்பது நிரூபிக்கப்பட்ட ஒரு உண்மையாக உள்ளது.

கல்லீரலுக்கு நன்மை

தங்களுடைய கடந்த கால ஆய்வுகள் காபி உடலுக்கு நல்லது, அதிலும் குறிப்பாக கல்லீரலுக்கு காபி நன்மையே செய்கின்றது என்று உறுதி செய்வதை ஆய்வாளரான கார்லோ லா வெக்கியா தெரிவிக்கின்றார்.

ஈரல் நோய்

இதுமட்டுமின்றி, ஈரல் நோய் மற்றும் கல்லீரல் என்சைம்களிடையே இதனுடைய நன்மை தரும் விளைவுகளும் கணக்கில் எடுத்துக்கொள்ளப்படுகின்றன என்று கூறுகிறார் வெக்கியா.

16 ஆய்வுகள்

1996ம் ஆண்டு முதல் 2012ம் ஆண்டு வரை 16 ஆய்வுகள் மேற்கொள்ளப்பட்டுள்ளன. 3153 பேர் இந்த ஆய்வில் பங்கேற்றுள்ளனர்.

இத்தாலியின் மிலன் நகரில் உள்ள மரியோ நெகரி ஆராய்ச்சி நிறுவனத்தின் மருத்துவ அறிவியல் மற்றும் சுகாதாரத்துறையைச் சேர்ந்த நோய் தொற்று அறிவியல் பிரிவில் ஆய்வில் ஈடுபட்டுள்ளார் வெக்கியா.