துபாயில் கோலாகலமாக நடைபெற்ற முதுவை சங்கமம்

துபாய்: துபாயில் ஐக்கிய முதுகுளத்தூர் முஸ்லிம் ஜமாஅத் சார்பிலான "முதுவை சங்கமம் 2013" கடந்த வெள்ளிக்கிழமையன்று முஷ்ரிஃப் பூங்காவில் வெகு சிறப்பாக நடைபெற்றது.

இந்நிகழ்ச்சியின் தொடக்கத்தில் துணைத் தலைவர் அஹமது இம்தாதுல்லா இறை வசனங்களை ஓதினார். இந் நிகழ்ச்சிக்கு ஜமாஅத் தலைவர் ஹெச். இப்னு சிக்கந்தர் தலைமை வகித்தார்.

அவர் தனது தலைமையுரையில் ஒற்றுமையுடன் செயல்பட்டு நமது ஊரின் வளர்ச்சிக்கு உதவ வேண்டும் என்று கேட்டுக் கொண்டார். பொதுச்செயலாளர் முதுவை ஹிதாயத் தமது வரவேற்புரையில், ஜமாஅத் தாயகத்தில் மேற்கொண்டு வரும் கல்வி மற்றும் சமுதாய மேம்பாட்டுப் பணிகள் குறித்து விவரித்தார்.

முதுகுளத்தூரைச் சேர்ந்த சிங்கப்பூர் ஐக்கிய இந்திய முஸ்லிம் சங்க தலைவர் ஃபரீஹுல்லா, சென்னை முதுகுளத்தூர் இரும்பு வியாபாரிகள் சங்க தலைவர் ஜாஹிர் ஹுசைன், மதுரை பிலால் ஹோட்டல் அதிபர் லயன் காஜா முஹைதீன் ஆகியோர் நினைவுப் பரிசு வழங்கி கௌரவிக்கப்பட்டனர்.

சிங்கப்பூர் ஃபரிஹுல்லா குறித்த அறிமுகவுரையினை புதிய நிலா மு. ஜஹாங்கீர் நிகழ்த்தினார். சிங்கப்பூர் ஃபரீஹுல்லா தமது ஏற்புரையில், அமீரகத்தில் தாயக உறவுகளை சந்திப்பதற்கு வாய்ப்பினை ஏற்படுத்திக் கொடுத்தமைக்கு நன்றி தெரிவித்துக் கொண்டார். 35 ஆண்டுகளுக்குப் பின்னர் உறவுகளை சந்திக்கும் வாய்ப்பு கிடைத்துள்ளது குறித்து பெருமகிழ்வு அடைவதாகவும் அவர் குறிப்பிட்டார்.

சென்னை ஜாஹிர் ஹுசைன் பேசுகையில், சென்னையில் நடைபெறும் தங்களது சங்க நிகழ்விலும் அமீரகப் பிரதிநிதிகள் கலந்து கொண்டு சிறப்பிக்க வேண்டும் என்று கேட்டுக் கொண்டார்.

மேலும் அபுதாபி அமீனுதீன், அஹமது சாதிக் ஆகியோரும் உரை நிகழ்த்தினர். ஜமாஅத் தலைவர் ஹெச். இப்னு சிக்கந்தரின் சேவையினைப் பாராட்டி நினைவுப் பரிசு வழங்கி கௌரவிக்கப்பட்டது,

ஜமாஅத் தலைவர் ஹெச். இப்னு சிக்கந்தர் நிர்வாகக்குழுவினருக்கு நினைவுப் பரிசுகளை வழங்கினார். பொருளாளர் ஜஹாங்கீர் நன்றி கூறினார்.

இந் நிகழ்வில் சிங்கப்பூர் ஐக்கிய இந்திய முஸ்லிம் சங்க நிர்வாகக்குழுவினர், அமீரகத்தின் பல்வேறு பகுதிகளிலிருந்தும் ஜமாஅத் அங்கத்தினர்கள், தாய்மார்கள் உள்ளிட்டோர் பங்கேற்றுச் சிறப்பித்தனர்.

இந்த நிகழ்விற்கான ஏற்பாடுகளை ஜாஹிர் ஹுசைன், ஹபிப் திவான், அஹமது சாதிக், ஜாபர் கனி உள்ளிட்ட குழுவினர் செய்திருந்தனர்.

English summary

Muduvai Sangamam 2013 was held in Dubai on december 20. Mudukulathur people living there attended the function.