ஷார்ஜாவில் வண்ணமயமாக நடந்த நிரித்யசமர்ப்பண், இந்திய கிளாசிக்கல் நடன நிகழ்ச்சி

ஷார்ஜா: ஷார்ஜா அமெரிக்க பல்கலைக்கழக அரங்கில் டிடிஎஸ் இவெண்ட்ஸ் சார்பில் நிரித்யசமர்ப்பண் என்ற இந்திய கிளாசிக்கல் நடன நிகழ்ச்சி 12.06.2015 அன்று மாலை நடைபெற்றது. ஏழாவது ஆண்டாக நடைபெற்ற இந்த விழாவில் அமெரிக்காவின் மேரிலேண்ட் மாகாணத்தில் உள்ள போக்குவரத்து துறையில் கமிஷனராக உயர் பதவி வகித்து வரும் தமிழகத்தைச் சேர்ந்த டாக்டர் ராஜன் நடராஜன், முன்னாள் நாடாளுமன்ற உறுப்பினர் எம். அப்துல் ரஹ்மான் ஆகியோர் சிறப்பு விருந்தினர்களாக பங்கேற்றனர்.

நிகழ்ச்சிக்கு டிடிஎஸ் இவெண்ட்ஸின் தலைவி ஜெயந்தி மாலா சுரேஷ் தலைமை வகித்தார். துணைத் தலைவர் குத்தாலம் ஏ. லியாக்கத் அலி முன்னிலை வகித்தார். துணை பொதுச் செயலாளரும், நிகழ்ச்சியின் ஒருங்கிணைப்பாளருமான பிரசன்னா நாயுடு வரவேற்புரை நிகழ்த்தினார்.

சிறப்பு விருந்தினர்கள் நினைவுப் பரிசு வழங்கியும், பொன்னாடை அணிவித்தும் கௌரவிக்கப்பட்டனர்.

விழாவில் பேசிய டாக்டர் ராஜன் நடராஜன் கூறுகையில், வெளிநாட்டில் வாழ்ந்து வரும் தமிழர்களாகிய நாம் நமது தமிழகத்திற்கு முன்னோடியாக திகழ்ந்து அனைத்து துறைகளிலும் பரிணமிக்க வேண்டும் என்றார். தமிழக அரசு வெளிநாடு வாழ் தமிழர்களை ஒருங்கிணைத்து செயல்பட்டாலே போதும். தமிழகத்தின் வளர்ச்சிக்காக நம்மைப் போன்ற வெளிநாடு வாழ் தமிழர்கள் முதலீடு செய்வதற்கு தயாராக இருக்கின்றனர். இந்த நிகழ்ச்சியில் சிறு குழந்தை முதல் தங்களது நடன திறமையை வெளிப்படுத்தி வருவது பாராட்டுக்குரியது. இதற்காக பெரும் முயற்சிகள் செய்து வரும் நடன ஆசிரியை கவிதா பிரசன்னா மற்றும் அவரது குழுவினரை பாராட்டினார்.

நடன ஆசிரியை கவிதா பிரசான்னாவிடம் பயின்ற 200க்கும் மேற்பட்டோர் தங்களது நடனத் திறமையை அரங்கேற்றம் செய்தனர். விழாவில் பங்கேற்ற மாணவ, மாணவிகள் அனைவரும் நினைவுப் பரிசு வழங்கி பாராட்டப்பட்டனர். இந்த விழாவிற்கான ஏற்பாடுகளை ஏ. முஹம்மது தாஹா, பிரசன்னா,
கீதா கிருஷ்ணன், சுந்தர், விஜயேந்திரன், விஜயராகவன், பாலா உள்ளிட்ட குழுவினர் சிறப்புடன் செய்திருந்தனர்.

அல் ஹஸீனா ஜுவல்லர்ஸ், பிரைம் மெடிக்கல் சென்டர், பிளாக் துளிப் பிளவர்ஸ், அப்கிரேட் டயர் நிறுவனம், துபாய் பிரிண்டிங் பிரஸ், பெருமாள் பூ க்கடை, நுஜும் சென்னை உணவகம் உள்ளிட்ட நிறுவனங்கள் இந்த நிகழ்ச்சி சிறப்புடன் நடைபெற உதவி வழங்கியிருந்தன. விழாவில் ஆயிரத்திற்கும் மேற்பட்டோர் கலந்து கொண்டு சிறப்பித்தனர்.

English summary

Nrithyasamarpan, Indian classical dance programme was held in Sharjah on june 12th.