அமெரிக்காவின் 6 நகரங்களில் ‘சிரிக்கலாம் வாங்க’ நிகழ்ச்சி

By Shankar

Published: Sunday, April 10, 2016, 11:30 [IST]

Subscribe to Oneindia Tamil

கலக்கப்போவது யாரு.. அசத்தப்போவது யாரு... நிகழ்ச்சிகள் மூலம் புகழ் பெற்ற வெங்கடேஷ், கிறிஸ்டோபர் மற்றும் மேலூர் சசி ஆகியோர் அமெரிக்காவின் பல்வேறு நகரங்களில் நடைபெற்று வரும் சித்திரை திருவிழா, தமிழ்ப் புத்தாண்டை ஒட்டிய கலை நிகழ்ச்சிகளில் சிறப்பு விருந்தினர்களாகக் கலந்து கொண்டு ‘சிரிக்கலாம் வாங்க' என்ற நகைச்சுவை நிகழ்ச்சியை வழங்க இருக்கிறார்கள்.

கடந்த முறை மிச்சிகன் டெட்ராய்ட்டிலும், மிசெளரி செயிண்ட் லூயிசிலும், மின்னசோட்டாவிலும், விஸ்கான்சின் மேடிசனிலும், டெக்ஸாஸ் டாலசிலும், கலிபோர்னியாவில் சாக்கரமெண்ட்டோவிலும் நிகழ்ச்சிகள் செய்து அமோக வரவேற்பைப் பெற்ற அசத்தல் மன்னர்களின் ‘சிரிக்கலாம் வாங்க' நிகழ்ச்சி, இம்முறை ரிச்மாண்ட், வாஷிங்டன் தலைநகரம், கலிபோர்னியா வளைகுடாப் பகுதி, மத்திய ஃபுளோரிடா, தெற்கு ஃபுளோரிடா, மற்றும் ஹாரிஸ்பெர்க் ஆகிய நகரங்களில் அந்தந்த உள்ளூர் தமிழ்ச் சங்கங்களின் ஆதரவில் நடைபெற இருக்கிறது.

சென்ற முறை இந்த நகைச்சுவைக் குழு அமெரிக்காவின் பல இடங்களில் நடத்திய தனி நபர் நகைச்சுவை (Stand-up Comedy), பலகுரல் நிகழ்ச்சி (Mimicry) , பல்சுவை நகைச்சுவை (Variety Comedy), வேடிக்கை விளையாட்டு (Fun Games), அதிர்ஷ்டம் அழைக்கிறது (Lucky Trivia Games) என பலதரப்பட்ட நிகழ்ச்சிகளை உள்ளடக்கிய ‘சிரிக்கலாம் வாங்க' நிகழ்வு மக்களிடம் மிகுந்த வரவேற்பைப் பெற்றிருந்தது.

‘சிரிக்கலாம் வாங்க!' நகைச்சுவை நிகழ்ச்சியில் பார்வையாளர்களான குழந்தைகள், இளையோர்கள், ஆண்கள், பெண்கள், பெரியவர்கள் என அனைவரும் பங்கு பெறும்படியும், பரிசுகள் பெறும்படியும் வடிவமைக்கப்பட்டுள்ளது. ஆபாசமில்லாத வகையில் குடும்பத்துடன் அனைவருடன் சேர்ந்து ரசித்துச் சிரிக்கும்படியான நிகழ்ச்சி என்பதே நிகழ்வின் தனிச்சிறப்பு.