அயல் தேசத்து அடையாளங்களாய்...- அனந்த்
கூரைக்கு மேலே வானம் இருப்பது தெரியாமல்
வாரங்கள் சில சத்தமின்றி கடந்து போகும்
திருட்டு விசிடியிலும் காண சகியா திரைப்படங்கள் இங்கே
சனி/ ஞாயிறுகளின் வெறுமை தொலைப்பதற்காய்...
வறண்ட வாரங்களின் இரண்டு தினங்களுக்காய்
சுருண்டு கொண்ட, சபிக்கப்பட்டதான ஒரு வாழ்க்கை.
மாதம் இருமுறை ஏதோ ஒரு
இந்திய உணவு சாலையில்
இரண்டு மாதங்களுக்கொருமுறை...கூட்டாஞ்சோறு
யாருக்கோ பிறந்த நாளாம்...
சந்திக்கும் இடமெல்லம் சலிப்பில்லாமல் அதே கேள்வி
மீண்டும்...மீண்டும்
ஏப்பா.....பச்சை அட்டையின் பயணம்
பாதையில எங்கெருக்கு?
ஏதோ சொர்க்கத்தில் இவரிடத்தை அது
முன் பதிவு செய்திடும் போல்...
எப்போதேனும் நிகழக்கூடும்
சில தொலைபேசி அதிர்வுகளுக்காய்
எங்கோ வெகு தொலைவில் உயிர் தாங்கிச் சில
முதுமைப் பறவைகள்.
வெறுமை என்னதான் இருந்தாலும்
பெருமை என்னவோ இருக்கத்தான் செய்கிறது
ஏதோ சாதித்துவிட்டதாய் இவர்களுக்கும்
அயல் தேசத்தில் பிள்ளை ஆண்டு வருவதாய் அவர்களுக்கும்