கைம் பெண்- க்ருஷாங்கினி

தெரிந்துதான் போயிற்று நேரனுபவம்
எளிதல்ல என்றும் என்று

கைம் பெண் என்றனர்
கணவன் இறந்ததும்

பெண்ணின் புலம்பலோடு
ஆணின் நெருப்போடு
எரிந்தாள் உயிரோடு அவள்
தன் பதியின் உடலோடு.

நிழல் போல சார்ந்தார் உணர்வைத்
தனதாக்கி சிரித்தாள், அழுதாள் எதிர்மறையாக
வளை நொறுங்க மனமுடலும் நொறுங்க
ஆணைப் போல உள்ளடக்கி, அடிமை வாழ்வைத்
தனதாக்கி வாழ்ந்தாள் என
சொல்லல் தகுமோ?

தீர்மானமாயிற்று மனம் முழுக்க,
சொட்டும் வெளிவராது கண்ணீர் என
தெரிந்துதான் போயிற்று நேரடி அனுபவம்
எதிர் கொள்ளல் எளிதல்ல என்று

கிளம்பினேன் பொட்டுடன் வாகனம் ஓட்டி
உறைந்த சோகத்தைப் போர்த்திய புன்னகையுடன்
உடை விறைக்க, உடல் சரிய, நடை நிமிர
விசிறி கீற்றுச் சரிகை ஒளிவிட

அலுவலகத்தில் அனுதாபம் அலை வழிய
சில நாட்கள் கிளறிய சோகம்
வேடிக்கை அல்லது வம்பு
கிண்டல் உடன் கூடிய சீண்டல்

சேகரித்து சிறிய
பையிலிட்டு வெகுதூரம்
விசிறி விட்டு
தெளிந்து நடந்தேன், நடப்பேன்
முன்னேறி, முன்னேறி - என்
வழி நோக்கி காற்றென, ஒளியென

தெரிந்துதான் போயிற்று நேரடி அனுபவம்
எளிதல்ல என்றும் என்று

- க்ருஷாங்கினி([email protected])

இவரது முந்தைய படைப்பு:

படைப்புகளை அனுப்ப:

கவிதை, கட்டுரை, சிறுகதை என படைப்பிலக்கியத்தின் எந்தக் கூறுகளிலும் உங்களதுஆக்கங்களை அனுப்பலாம். அனுப்ப வேண்டிய மின்னஞ்சல் முகவரி: [email protected]

படைப்புகளை அனுப்பும்போது, நீங்கள் எந்த எழுத்துருவை பயன்படுத்தியுள்ளீர்கள் என்பதை அறியத் தரவும்.