சிவகாசி அணுகுண்டே....

சிவகாசி அணுகுண்டே...
உன்னைப்
பற்ற வைத்தவர்களே
வெடித்துப்போனார்கள்!

காவல்துறையின்
கவர்ச்சி வாசகமே...
உன்னை உச்சரித்தவர்களே
உதடு கிழிந்து போனார்கள்!

காக்கிச்சட்டைகளின்
மோகப்பொத்தானே...
உன்னை உரித்தவர்களே
அம்மணமாகிப் போனார்கள்!

லத்திகளும் பூட்சுகளும்
ஏறி இறங்கிய
புண்ணியப் படிக்கட்டு நீ...
சுயம்வர லகரியை
சுதந்திரமாய் மீட்டிய
தசரதப்புருஷி நீ...

கடமையை கண்ணியமாய்
கட்டுடைத்த
காந்தர்வ மோகி(னி)நீ...

தொலைக்காட்சிகளின்
சிறப்புப்பார்வையே...
பத்திரிக்கைகளின்
தலையங்கமே...
அட்டைப்படங்களில்
அடிக்கடி காண்பித்து
உன் வாழ்க்கை
தொலைந்ததை
வியாபாரமாக்கிக்
கொண்டிருக்கிறோம்
நாங்கள் வெட்கமின்றி !

உன் வாக்குமூலத்தால்
நாக்குத் தள்ளிப்போயுள்ளனர்
பலபேர்...
நீ வாய் திறந்ததால்
பேயறை வாங்கியுள்ளனர்
சிலபேர்...

உன்
வழக்கின் முடிவு
எதுவாயிருப்பினும்
ஜெயித்திருக்கிறாய் நீ...
தைரியமாய்த் துரோகிகளைச்
சந்திக்கு இழுத்ததால் !

ஜெய... ஜெய... நமஹ...

- நெப்போலியன், சிங்கப்பூர்([email protected])

படைப்புகளை அனுப்ப:

கவிதை, கட்டுரை, சிறுகதை என படைப்பிலக்கியத்தின் எந்தக் கூறுகளிலும் உங்களதுஆக்கங்களை அனுப்பலாம். அனுப்ப வேண்டிய மின்னஞ்சல் முகவரி: [email protected]

படைப்புகளை அனுப்பும்போது, நீங்கள் எந்த எழுத்துருவை பயன்படுத்தியுள்ளீர்கள் என்பதை அறியத் தரவும்.