மற்றொரு லெமூரியா. . .- பத்மப்ரியா

உலகிலேயே இரண்டாவது அழகியே
எந்த காலத்திலும் எல்லை மீறாமல்
எதையும் எதிர்பாராமல்
ஏந்திய செல்லமே. . . எங்கள் தாயே . .

நீயும் பொங்குவாயா. . .
பொங்கியே பிஞ்சுகளை
பொசுக்குவாயா?

நீரில் மூழ்கியல்ல -- இந்த
அதிர்ச்சியில் மூழ்கியே போனவர் பாதி

அன்னையே அழிப்பாளோ என
அமைதியாய் அடக்கமானோர் மீதி

நீ அடித்ததே தவறு.
அதோடு நில்லாமல்
அடிக்கிற கைதான்
அணைக்குமென - உயிர்களை
அணைத்ததும் தவறு.

கோழி மிதித்து குஞ்சுகள்
முடமாகித்தான் போனோம்

சல்லடையால் சலித்து
சலவை செய்தோம் உன்னை
நீயோ. . .
சகதியால் அடித்து
சவங்களைச் செய்தாய் இங்கு

உலகக் கோப்பை கிரிக்கெட் பார்த்து
உள்ளுர் கிரிக்கெட் விளையாடிய
உன் குழந்தைகளோடு
உனதிந்த
ஊழி விளையாட்டால்
உனக்குக் கிடைத்தது எந்தக் கோப்பை?

நாங்கள் கட்டியது
இரண்டு சமாதிகள் மட்டுமே,
இல்லையெனச் சொல்லவில்லை
அதற்காக நீ. . .
இரண்டாயிரம் பேருக்கு கட்டலாமா?

மங்கா நிலவொளியில் உன்
மடியமர்ந்து
மனம் குளிர்ந்தோரை
மண்ணுக்குள் மறைத்து
மற்றொரு லெமூரியாவா. . .?

ஏதோ பார்த்துச் செய். . .
நாங்கள் வெறும் மனிதர்கள் மட்டுமே.