நடமாடும் கவிதைகள்- பத்மப்ரியா

சின்ன கருவிழிகள்
சிவப்பு உதடுகள்
சிலுப்பிவிட்ட தலைமுடி
பிளாஷ் லைட் காலணி
பேண்ட் பாக்கெட்டில் கை- ஸ்டைலாம்

சாயம் நீங்கிய ஜீன்ஸ்
சந்தன நிற டீ ஷர்ட்
ஓவர் கோட்டை
இருபுறமும் விலக்கி
இடுப்பில் கை - ரஜினியாம்

தூக்கலாய் சென்ட்
ஒப்பனையின் முடிவாய்
கருப்பு குளிர் கண்ணாடி

படிக்கட்டில் பத்துமுறை
இடறினாலும்
சாக்லேட் பெட்டியை
தவறவிடாத சாதுர்யம்
ரசித்தபடி நின்றிருந்தேன்

தெலுங்கு கதாநாயகனாய்
அருகில் வந்தது அந்த
மூன்றடி கவிதை
கூடவே துணைக்கு
நாலடி அண்ணன்- - சாதாரண
மஞ்சள் சட்டை வெள்ளை பேண்ட்டில்

" சாக்லெட் எடுத்துக்குங்க "
ஒன்றை எடுத்ததும்
பட்டென மூடியது பெட்டியை

கூட வந்த அண்ணனிடம்
உனக்கு என்று பிறந்தநாள்? என்றேன்
" அண்ணனுக்குத்தான்
இன்னைக்கு பிறந்தநாள் "
என்றது இது.