இவன்- பத்மப்ரியா

கல் தடுக்கி கால் இடறியது- - உன்
கண் தடுக்கி மனமும் இடறியது
காலுக்கு மருந்திட்டு
கட்டுக்குள் வைத்துவிட்டேன்
கசியும் மனதினை கட்டி வைக்க
வழியொன்றை அறியேன்

ஆதரவாய் பார்த்து அன்பாய் பேசாதே
தோள்களில் சாயச் சொல்லி
என் தலையை தாழ்த்தாதே

எதிரியாகிவிடு
எளிதில் வெட்டி விடுவேன்

நீ என்னவோ கார்மேகம் தான்
ஆனால்
நான் பயணிப்பது பாலைவனத்தில்

பயணமே பாரமாய் நடக்கையில்
புதைகுழி அன்பை பரிசளித்தாய்
அதுவும் போதாதென
என் தனிமையைப் பறித்தாய்

அவரவர் பயணம் அவரவர்க்கு
அவ்வளவு ஏன்
அந்திப் பயணத்தில்
அனைவரும் தனித் தனியே தானே?

இறைவா . ...
எதிரிகளை நான் பார்த்துக் கொள்கின்றேன்
இவனிடமிருந்து என்னைக் காப்பாற்று