நிலா - ப்ரியன்

வானத்து விண்ணொளியில்
மொட்டை மாடி குளித்திருக்க
விண்ணொளி தரும் நிலாவின்
தண்மையில் புவி குளித்திருக்க
மொட்டை மாடியில்
வேகமெடுத்துக் கிளம்பியது
அரட்டை!

பக்கத்து வீட்டு பத்மாவை
பார்த்து சிரித்து
ஊர்தேசம் எல்லாம் சுற்றி
வானில், நிலாவில்
முட்டி நின்றது அது!
மேடு பள்ளம் நிறைந்த
காற்றும், உயிரில்லா
பெரிய உருண்டைக் கல்
என்று பகன்றான் ஒருவன்!

கூடுதல் தகவலாய்
பசிபிக் பெருங்கடலில் இருந்து
பிய்த்தெரியப்பட்ட பூமியின்
பகுதியென்றான் அவனே!
வானமகள் தினம்தினம்
அவளே அழித்து
அவளே விதம் விதமாய்
இட்டுக் கொள்ளும்
வெள்ளைப் பொட்டென்றான் ஒருவன்!
நல்ல கற்பனை தான்!

பாட்டி வடை சுட்ட கதையும்
முயலின் தியாக கதையையும்
கலந்து சொல்லி
குழப்பிக் கொண்டு போனான்
மிஞ்சியவன்!

என் முறை வந்தது
நிலா அதுவென்றேன்!
அதுவை அதுவாக பார்த்தல்
அழகென்றேன்!
ஒருமாதிரிப் பார்த்து
உறங்கப் போனார்கள்!
இருட்டில் எவனோ
என்னைப் பற்றி முனுமுனுத்தான்
குருட்டு கண்காரன் என்றான்!

உறக்கம் கண்ணில் ஒட்டாமல்
கைப்பிடிச் சுவர் பற்றி
சாலையைப் பார்த்திருந்தேன்!
நேற்றைய மழையில்
தேங்கிய நீரில் ஒற்றையிலை
உதிர்ந்து விழ,
நீரில் தங்கிய
நிலா மெல்ல தளும்பியது!

தன்னை நிலவாகப்
பார்த்தமைக்கு
நன்றி சொல்லி
விழி
தளுதளுத்ததாய் தெரிந்தது
என் குருட்டுக் கண்களுக்கு!!