ஓடாத கடிகாரங்கள்

நின்றுபோன
கடிகாரங்களின்
தெளிவிக்கப்படாத மூர்ச்சை
தெரிவிக்கிறது பல விடயங்களை

சாவி முடுக்கி
பராமரித்த தாத்தா
பரமனடி சேர்ந்ததை

ஒரே பையன்
அமெரிக்கா போனபின்
உயர ஏறி சாவி கொடுக்க
ஆற்றலற்றுப் போன
பெற்றோரின் தனிமையை

கல்யாணப்பரிசாக வந்து
கடிகாரத்தின்
பேட்டரி மாற்ற
பணம் பற்றாத
மாத இறுதி எதார்த்தங்களை

மணிக்கொரு முறை அலறி
குழந்தையின் தூக்கம் கெடுப்பதை தவிர்க்க
வலுக்கட்டாயமாய் நிறுத்தப்பட்டிருக்கும்
கடிகாரங்கள்
சில வீடுகளில்.

ஓடும் கடிகாரங்கள்
நேரத்தை உணர்த்த
ஓடாத கடிகாரங்கள்
மெளனமாய் உணர்த்துவதோ
ஒரு குடும்பத்தின்
நிகழ்வுகளை.