கூண்டுகளில் சமாதான புறாக்கள்ரிஷி சேது

கூரிய கத்தியோ
சைக்கிள் செயினோ
அல்லது கொஞ்சம்
பெரிதாய் துப்பாக்கியோ
நீங்கள் கட்டாயம் வைத்திருக்கப்போகீறீர்

நானும்

சற்றேரக்குறைய மேல் சொன்னவையோ
அல்லது கையடக்க
பென்சில் துப்பாக்கியோ,
நாட்டு வெடிக்குண்டோ
வைத்திருக்கக் கூடும்

நாளொரு மேனியும் பொழுதொரு வண்ணமாய்
நாம் தீவிரவாதம் கற்கிறோம்
நமக்கான பேச்சுவார்த்தைகளின் போது
பறக்கவிடும் புறாக்கள் மீண்டும்
கூண்டிலடைக்கப்படுகின்றன
நம் பேச்சிக்கிடையே வைக்கப்பட்டிருக்கும்
பூங்கொத்துக்கள் கருகிப் போகின்றன

நமக்கான சமாதான முகங்கள்
ஒளிந்துகொள்கின்றன

நம்புங்கள் பேச்சுவார்த்தையின்
விளைவாய் ஏதேனும் உடன்படிக்கை
ஏற்பட்டாலும்-அது
என்னை தயார்ப்படுத்திக்கொள்ளவேயன்றி
வேறில்லை

நம் குழந்தைகள்
அணுகுண்டோ அல்லது
ரிமோட்டிக் வெடிகுண்டோ
வைத்திருக்கலாம்- இங்கே
பாதுகாப்பென்பது- உன்னைவிட
பலமான ஆயுதம் வைத்திருக்கிறேன் என்பதுதான்

தீவிரவாதமென்பது
சமாதானத்திற்கு எதிரானது மட்டுமல்ல
நம் மீதான அவநம்பிக்கையும் தான்

ஒரு வேளை இதெல்லாம்

வெறும் கற்பனையென்றால்- எனக்கு
நிஜம் குறித்த சந்தோஷமும்
ஆமெனில்
மனிதனெனும் மிருகமும்
சூரிய குடும்பத்தின் ஒரு மிகப்பெரிய
கோளும் அழிய போவது உறுதி...

இப்போது
இதை
இங்கு
முடிவு செய்வோம்
வாழ்வோமா? சாவோமா?