விதியும் சதியும்

நீரோட்டத்தில் நீச்சலடிக்கின்றேன்
கவலையென்பது கடந்த காலமானது
ஊரிலென்போல் இன்னும் சிலர்
உவகைக்கு அளவில்லை

வாழ்ந்து கெட்ட கதை
வாழ்வது கடினம்தான்
எம்பாலர்க்கு கெட்டது புதிதில்லை
கேட்ட கதையில் அல்ப சந்தோஷம்

கால் போன போக்கில் மனம்
கிடைத்ததை உண்டு பின் கழித்து
அசை போடவும் மறந்து
அயர்ந்து உறங்கிய பொற்காலம்

செத்த பின்பு சிலை வைக்கும்
சீக்குப் பிடித்த சமூகமிது
கெட்டலைந்த எனக்கு
புனர் வாழ்வா?

அய்யனார் கோவிலில்
அழுது புலம்பிய பலன்தானிது
சில நாளாகவே மாறுதல்
ஏதோவொன்று குறுகுறுப்பாய் என்னுள்

விரட்டிய விதி ஒதுக்கவில்லையோ?
பாசமானோர் மீண்டும் பழக்கமானார்கள்
அனுபவித்த வலி அறியாததில்லை
இருப்பினும் இன்பமாய் இன்னொருமுறை

காம்பினை கவ்விய குழவி
தினவெடுத்தது நாவு மீண்டும்
முதல் நாளிலே கட்டாய கறப்புதான்
வைக்கோல் கன்று சிலிர்க்கவேயில்லை