கதவு- க்ருஷாங்கினி

அறைக்குக் கதவு தேவை
சுய உபயோகத்திற்கு எனினும்
பொது உபயோகத்திற்கு எனினும்
அறைக்குக் கதவு அவசியம்.

உள் நுழைய உத்தரவு கதவா தர வேண்டும்?
உந்தித் தள்ளியும்
மெதுவாகத் திறந்தேனும்
உள் நுழைதல் மட்டுமே எல்லை
எனினும் கதவு வேண்டும்.

சுய உபயோகத்திற்கு மட்டுமெனில்,
பாதுகாக்க பத்திரப்படுத்த
அறைக்குக் கதவோடு பூட்டும் தேவை
அங்கு நுழைந்தும் அவசரமாய் வெளியேறியும்
கதியின் இயக்கத்தில்
கற்களும் கரைசலும், கரைத்தலும்
பிண்டமும் முழுதுமான
பலப்பலப் பண்டங்கள் வெளியேற்றம்
அடைத்தலும், திறத்தலும்
உத்தரவு அவசியமற்ற கதவின் வேலையானது.