கொஞ்சமா பிரிவினைகள்....

சிகப்புகம்பள காஷ்மீரத்தை
குருதியால் நிரப்பும் குரூரம்
நக்சலைட்டுகளின் களிநடனத்தில் ஆந்திரம்
காவிரியை தடுத்துநிறுத்தும் கர்நாடகம்.....

இப்படி எனக்கு சொல்லிக்கொடுக்கப்பட்ட
வரலாற்று நாகரிகம்
பிரிவினையின் தொடரோட்டம்
எங்கும்- நமக்குள்கூட

நேற்றைய இரவில்
நிகழ்ந்த சாதிச்சண்டையின் முடிவில்
உன் சாதியும், என் சாதியும்
தங்களைப்புதுப்பித்துக்கொண்டன- முன்னிலும் வலிதாய்
நம் நட்பின் முகம்கூட கிழிக்கப்பட்டது...
நீயும் நானும் கூட அடித்துக்கொண்டோம்
சாதி முகம்கொண்டு

சாதி இரண்டொழிய .. என்றவனும்
சாதிகள் இல்லையென்றவனும்- இங்கில்லையென்பதால்
எனக்கு பாரதியும் புரியவில்லை வரலாறும் புரியவில்லை

போய் வா நண்பா
முன்னூறுகோடி முகம்
எனக்கான ஒரு புதிய நண்பனையும்
ஒரு புதிய எதிரியையும் நான் தேடிக்கொள்வேன்
நீயும் அப்படியே...

உலகத்தின் எல்லாமூலையிலும்
அரசியல், அண்டைநாடு, சாதிச்சண்டை
இவைகளின் முடிவிலெலாம்
உன்னையும் என்னையும் போலவே
சண்டையிட்டு பிரியும் நண்பர்கள்...

போய்வா நண்பா
நாளைய புதிய நண்பனையும்
புதிய எதிரியையும் தேடி.....

-ரிஷி சேது