தொடர் வண்டியின் நெடுங் கதை...!
- சாந்தி பழனிசாமி
இலட்சியங்கள் பல சுமக்கின்ற மானிடர்களை சுமந்து செல்கிறாயே
உனக்கென்று இலட்சியம் ஏதேனும் உண்டோ!
சிறு குறு வியாபாரிகளின் சங்கம சந்தையாய் விளங்குகிறாயே
அவர்கள் உனக்கு வரிகட்ட வேண்டுமென்று எதிர்பார்த்ததுண்டோ!
கேளாதோருக்கும் பாராதோருக்கும் உதவிக்கரம் நீட்டுகிறாயே
உனக்கென்று உதவ எவரேனும் வேண்டுமென்று நினைத்ததுண்டோ!
அடித்தட்டு மக்களுக்கும் பணக்கார மக்களுக்கும் பலவிதங்களில் உள்ளாயே
உனது அங்கீகாரம்தான் என்னவென்று ஆலோசனை செய்ததுண்டோ!
எல்லா மதத்தவருக்கும் எல்லா மொழியினருக்கும் உரித்தாகின்றாயே
நீ எந்த மதம் உனக்கென்ன மொழி என்று சிந்தித்ததுண்டோ!
ஊரு விட்டு ஊரு செல்கிறாய் நாடு விட்டு நாடு செல்கிறாயே-நீ
உனது பிறந்த இடம் பற்றி பெருமை போற்றியதுண்டோ!
குளிர்சாதன வசதி தேவையில்லை உன்னில் பயணம் செய்கையில்-நீயோ
சுட்டெரிக்கும் வெய்யிலில் காய்கின்றோமென்று முகம் சுழித்ததுண்டோ !
நீ ஆற்றுகின்ற உதவிக்கு ஈடு இணை இல்லை - தொடர்வண்டியே
அதற்கு ஆயிரம் கோடி நன்றிகள் சொன்னாலும் ஈடாகாது
எங்கள் வாழ்க்கைப் பயணமோ முடியக்கூடியது -தொடர்வண்டியே
ஆனால் உனது பயணமோ முடிவில்லாத தொடர்கதை...!
Click it and Unblock the Notifications
Sign in with Google