For Quick Alerts
ALLOW NOTIFICATIONS  
For Daily Alerts
Just In
Oneindia App Download

தொடரும் நீட் மரணங்கள்.. எரியப்போகின்றன நீதியற்ற அரசனின் நகரங்கள்!

By Mathi
Google Oneindia Tamil News

-மனுஷ்ய புத்திரன்

மார்பில் அணிந்த துப்பட்டாவில் இருக்கலாம்
ரகசியக் குறிப்புகள்
தோளாடைகள் துகிலுரியப்பட்டு
தேர்வுமையங்களில் நுழைகிறார்கள்
நவீன பாஞ்சாலிகள்
அழியப்போகின்றன
அஸ்தினாபுரங்கள்

Writer Manushyaputhirans poem on NEET Death

மூக்குத்தியில்
காதணியில்
ஹேர் பின்களில் இருக்கலாம் இருக்கலாம்
ரகசியக் குறிப்புகள்
அணிகலன்கள் களையப்பட்டு
தலைவிரி கோலமாய்
தேர்வு மையங்களில் நுழைகிறார்கள்
நவீன கண்ணகிகள்
எரியப்போகின்றன
நீதியற்ற அரசனின் நகரங்கள்

காலணியில் இருக்கலாம்
ரகசியக் குறிப்புகள்
வெறுங்கால்களுடன்
பதைக்கப் பதைக்க
தேர்வு மையங்களில் நுழைகிறார்கள்
அவமானத்தின் நெருப்பில் குளிக்கும்
நவீன சீதைகள்
செருப்புகளால் ஆளப்பட்ட ராஜ்ஜியம்
செருப்புகளால் வீழப்போகிறது

தண்ணீர் பாட்டில்களில்
வியர்வையை துடைக்கும் கைக்குட்டையில்
இருக்கலாம்
ரகசியக் குறிப்புகள்
வியர்வை வழியும் உடல்களுடன்
தவித்த நாவுகளுடன்
தேர்வு மையங்களில் நுழைகிறார்கள்
ஊழிப்பெருவெள்ளத்தால்
கொலைகாரனின் கோட்டைகள் நொறுங்கப்போகின்றன

தொலைதூர நகரமொன்றின் விடுதியில்
வயோதிக தகப்பனை விட்டு விட்டு
தேர்வு மையத்தில் நுழைகிறான் ஒருவன்
அவனது தகப்பன் விடுதியில்
நிராதரவாக இறக்கிறான்
அவனது சில்லிட்ட சடலம்
மகனுக்காக தேர்வுமுடியும்வரை
பொறுமையாக காத்திருக்கிறது
பிணங்களின் மீது உருவாக்கப்பட்ட அதிகாரம்
பிணங்களால் அழுகப்போகிறது

ஏன் அஞ்சுகிறீர்கள்
ரகசியக் குறிப்புகளைகண்டு?
உங்கள் அழிவைக் குறிக்கும்
நாளின் ரகசியக் குறிப்புகளை
எங்கள் ஆடைகளில்
ஒளித்து வைத்திருக்கவில்லை
எங்கள் அணிகலன்களில் ஒளித்துவைத்திருக்கவில்லை
எங்கள் காலணிகளில்
ஒளித்துவைத்திருக்கவில்லை

உங்கள் அழிவிற்காக ரகசியக்குறிப்புகளை
எங்கள் ரத்த நாளங்களில் ஒளித்து வைத்திருக்கிறோம்
எங்கள் மீது விழும் சவுக்கடிகளின்
ரணங்களில் ஒளித்துவைத்திருக்கிறோம்

தேடுங்கள்
ரகசியக் குறிப்புகளை
எங்கள் உள்ளாடைகளில் கையைவிட்டு தேடுங்கள்
உங்களுக்கான இறுதிக் குறிப்புகளை
இதயத்தின் ஆழத்தில் ஒளித்துவைத்திருக்கிறோம்

English summary
Writer Manushyaputhiran's Poem on NEET Deaths.
 
 
 
உடனடி நியூஸ் அப்டேட்டுகள்
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X