மாணவர்களுக்கு இன்ப அதிர்ச்சி கொடுத்த Adobe! டெல்லி ஏஐ மாநாட்டில் வெளியான முக்கிய அறிவிப்பு!

Updated: Friday, February 20, 2026, 11:44 [IST]

Subscribe to Oneindia Tamil

டெல்லி: போட்டோஷாப் உள்ளிட்ட செயலிகளுக்கு மிகவும் பெயர் பெற்ற நிறுவனம்தான் Adobe. இந்த நிறுவனத்தின் செயலிகளை பயன்படுத்த கட்டணம் செலுத்த வேண்டும். ஆனால், இந்தியாவில் மாணவர்களுக்கு இந்த செயலிகளை இலவசமாக பயன்படுத்த அனுமதி வழங்க இருப்பதாக Adobe நிறுவனம் அறிவித்திருக்கிறது.

டெல்லியில் 'இந்தியா AI இம்பாக்ட் சமிட் 2026' எனும் தலைப்பில் நடைபெற்ற ஏஐ மாநாட்டில் இந்த அறிவிப்பை நிறுவனம் வெளியிட்டிருக்கிறது. இந்திய மாணவர்களின் படைப்பாற்றல் மற்றும் வேலைவாய்ப்பு திறனை அதிகரிக்கும் நோக்கில் இந்த அறிவிப்பு வெளியிடப்பட்டிருக்கிறது.

யார் யார் பயன் பெறுவார்கள்?

இந்தியாவில் அங்கீகரிக்கப்பட்ட உயர்கல்வி நிறுவனங்களில் பயிலும் மாணவர்களுக்கு இந்த ஆஃபர் வழங்கப்படும். இதன் மூலம் ஃபயர்ஃபிளை (Firefly), ஃபோட்டோஷாப் (Photoshop), அக்ரோபட் (Acrobat) போன்ற அதன் முக்கிய மென்பொருட்கள் இனி இலவசமாக பயன்படுத்த அனுமதி வழங்கப்படும். இதன் மூலம் லட்சக்கணக்கான மாணவர்கள் பயன் பெறுவார்கள்.

இது குறித்து அடோப்பின் தலைமை நிர்வாகி சாந்தனு நாராயண் கூறுகையில், "இந்தியாவில் கோடிக்கணக்கான மாணவர்களுக்கான படைப்பாற்றல் வாய்ப்புகளை அடோப் விரிவுபடுத்துகிறது. அவர்களுக்கு AI திறன்களை வழங்கி, பிரதமர் மோடியின் தொலைநோக்குப் பார்வைக்கு உத்வேகம் அளிக்கிறது. அடோபின் முன்னணி கருவிகளைக் கொண்டு இந்திய மாணவர்கள் 'விக்சித் பாரத்' கனவை விரைவுபடுத்துவார்கள்" என்று கூறியிருக்கிறார்.

இந்த அறிவிப்பின் மூலம், இந்திய அரசின் 'இந்தியாவில் உருவாக்குவோம்' பார்வையை வலுப்படுத்த முடியும் என்றும், அனிமேஷன், விஷுவல் எஃபெக்ட்ஸ், கேமிங், காமிக்ஸ் துறைகளில் 2030க்குள் 2 மில்லியன் வேலைவாய்ப்புகளை உருவாக்கும் 2026 மத்திய பட்ஜெட் இலக்கையும் இது பூர்த்தி செய்யும் என நிறுவனம் நம்புகிறது.

இலவச சேவைகள் மட்டுமல்லாது, இந்திய அரசுடன் இணைந்து, 15,000 பள்ளிகள் மற்றும் 500 கல்லூரிகளில் அமைக்கப்படும் கன்டென்ட் உருவாக்கும் ஆய்வகங்களுக்கு AI சார்ந்த சேவைகளையும், அங்கீகரிக்கப்பட்ட பாடத்திட்டங்களையும் அடோப் இலவசமாக வழங்குகிறது.

அடோப் நிறுவனத்தின் இந்த அறிவிப்பு இந்திய மாணவர்களிடையே வரவேற்பை பெற்றிருக்கிறது. தற்போது வரை போட்டோ ஷாப் போன்ற செயலிகளை பன்படுத்த வேண்டும் எனில், அதற்கு கண்டனம் செலுத்த வேண்டும். இந்த அறிவிப்பின் மூலம் இனி மாணவர்கள் இதை இலவசமாக பயன்படுத்துவார்கள்.