ஏ.ஐ-க்கு பழகாத 80% ஊழியர்களை கொத்தாக நீக்கிய தனியார் நிறுவனம்! உஷார் மக்களே!
வாஷிங்டன்: ஏ.ஐ எனப்படும் செயற்கை நுண்ணறிவு தொழில்நுட்பம் நாம் நினைத்து பார்க்க முடியாத மாற்றங்களை செய்து வருகிறது. அனைத்து துறையிலும் ஏ.ஐ மிகப்பெரிய அளவில் வளர்ச்சியடைந்திருக்கிறது. இந்நிலையில் ஏ.ஐ-க்கு பழகாத தனது நிறுவனத்தின் 80% ஊழியர்களை அப்படியே வேலையை விட்டு துரத்தியிருக்கிறார் தனியார் நிறுவனத்தின் சிஇஓ. இந்த சம்பவம் சர்வதேச அளவில் சலசலப்புகளை ஏற்படுத்தியிருக்கிறது.
இக்னைட் டெக் நிறுவனத்தின் தலைமை நிர்வாக அதிகாரி எரிக் வாகன்தான் இந்த சம்பவத்தை செய்தவர். இவர் செய்தது சரி என்றும், தவறு எனவும் இரு தரப்பு வாதங்கள் சோஷியல் மீடியாவில் விவாதங்களை கிளப்பியிருக்கின்றன.
இது, ஏ.ஐ சகாப்தத்தில் வெற்றிபெற, நிறுவனங்கள் தங்கள் தொழில்நுட்பத்தை மட்டுமல்லாமல், தங்கள் நிறுவன கலாச்சாரத்தையும் மாற்றிக்கொள்ள வேண்டும் என்பதைக் காட்டுகிறது. கடந்த 2023 ஆம் ஆண்டின் தொடக்கத்தில், ஏ.ஐ. வெறும் ஒரு கருவி மட்டுமல்ல, வணிகங்களுக்கு ஒரு அத்தியாவசிய மாற்றத்திற்கான கருவி என்று நம்பிய வாகன், தனது நிறுவனத்தின் பாரம்பரிய கட்டமைப்பைக் கலைத்தார்.
ஆரம்பத்தில், ஊழியர்கள் ஏ.ஐ.யை ஏற்க மறுத்தனர். இக்னைட் டெக் நிறுவனம் ஏ.ஐ. பயன்பாட்டை ஊக்குவிக்க கணிசமான தொகையை முதலீடு செய்தது. திங்கள் கிழமைகள் "ஏ.ஐ. திங்கட்கிழமை" என ஒதுக்கப்பட்டன. புதிய திறன்களைக் கற்றுக்கொள்வதற்கும், புதிய கருவிகளைப் பரிசோதிப்பதற்கும், முன்னோடி திட்டங்களைத் தொடங்குவதற்கும் இத்தினம் பயன்படுத்தப்பட்டது. Fortune அறிக்கையின்படி, ஊழியர்கள் ஏ.ஐ. தொடர்பான படிப்புகளை மேற்கொள்வதற்கு இக்னைட் டெக் நிதி உதவி அளித்தது. மேலும், ஏ.ஐ.யை ஏற்றுக்கொள்ள வெளிப்புற நிபுணர்களையும் நியமித்தது.
இருப்பினும், ஊழியர்களிடையே விரைவாக எதிர்ப்பு உருவானது. விற்பனை அல்லது சந்தைப்படுத்தல் துறையை விட தொழில்நுட்ப ஊழியர்களிடமிருந்தே அதிக எதிர்ப்பு கிளம்பியது ஆச்சரியமாக இருந்தது. ஏ.ஐ.யால் என்ன செய்ய முடியும் என்பதை விட, என்ன செய்ய முடியாது என்பதில் கவனம் செலுத்தி, பலரும் ஏ.ஐ.யின் திறன்கள் குறித்து சந்தேகம் தெரிவித்தனர். சிலர் வெளிப்படையாகப் பங்கேற்க மறுத்தனர். இன்னும் சிலர் திட்டங்களுக்கு எதிராகச் செயல்பட்டனர். இந்த எதிர்ப்பு வலுவாக இருந்ததாக வாகன் கூறினார்.
இது போன்ற எதிர்ப்புகள், எதிர்பார்க்கப்பட்டதுதான். ஏ.ஐ புதியதாக அமல்படுத்தபடும்போது வேலையிழப்பு குறித்த அச்சம் உள்ளிட்ட காரணங்களால் ஊழியர்களில் மூன்றில் 1 பகுதியினர் எதிர்ப்பு தெரிவிக்கத்தான் செய்வார்கள் என்று Fortune இதழ் தெரிவித்திருக்கிறது. ஆனால் வேலையிழப்பு போன்ற அச்சங்கள் தேவையில்லாதது எனவும் அது தெரிவித்திருக்கிறது.
வாகன் தனது நிறுவனத்தை மறுசீரமைத்தார். ஏ.ஐ.யில் நம்பிக்கை கொள்வது விவாதிக்கப்பட வேண்டிய ஒன்றல்ல என்ற முடிவுக்கு வாகன் வந்தார். தற்போதைய ஊழியர்களை மாற்றியமைப்பதற்குப் பதிலாக, தனது கண்ணோட்டத்தைப் பகிர்ந்து கொள்ளும் புதிய நபர்களை நியமிக்கத் தொடங்கினார். இவர்களை அவர் "ஏ.ஐ. புதுமை நிபுணர்கள்" என்று அழைத்தார். விற்பனை மற்றும் நிதி உட்பட ஒவ்வொரு துறையிலும் இந்த மாற்றம் ஏற்பட்டது.
முதலில் இக்னைட் டெக்கிற்கு தலைமை அதிகாரி புதியதாக மாற்றப்பட்டார். புதிய நபர் ஏ.ஐ குறித்த பாசிட்டிவான சிந்தனை கொண்டவர். அதன் பிறகு அனைத்து துறைகளிலும் ஊழியர்களை மாற்றியமைத்தார். இந்த மாற்றம் செலவு மிக்கதாகவும், இடையூறுகளை ஏற்படுத்தக்கூடியதாகவும், உணர்ச்சிபூர்வமாக மன அழுத்தத்தை ஏற்படுத்தக்கூடியதாகவும் இருந்தாலும், இது நடக்க வேண்டிய ஒன்று என்று வாகன் கூறினார். இந்த மாற்றங்களுக்கு பிறகு நிறுவனத்தின் லாபம் சுமார் 75% அதிகரித்தது.
எனவே நீங்களும் ஏ.ஐ குறித்து விழிப்புடன் இருங்கள். அதை கற்றுக்கொள்ளுங்கள், அதை எப்படி பயன்படுத்துவத என தெரிந்துக்கொள்ளுங்கள். அதுவே முக்கியமாகும்.
Click it and Unblock the Notifications
Sign in with Google