குரு பெயர்ச்சி 2023: குரு பார்க்க கோடி நன்மை.. இடைஞ்சல்களில் தப்பிக்க சொல்ல வேண்டிய மந்திரங்கள் இதோ!

சென்னை: குரு பகவான் மேஷ ராசிக்கு இடப்பெயர்ச்சி அடைகிறார். குரு பார்வை கோடி நன்மை. குரு பகவான் இருக்கும் இடத்தை விட பார்க்கும் இடங்கள் பலனடையும். மேஷம் ராசியில் பயணம் செய்யப்போகும் குருவின் பார்வை இந்த முறை சிம்மம், துலாம்,தனுசு ராசிகளின் மீது விழுகிறது. இந்த குரு பெயர்ச்சியால் சிலருக்கு காதல் மலரும் கல்யாண யோகமும் வந்து விட்டது. குரு பார்வையால் மேஷம் முதல் மீனம் வரை 12 ராசிக்காரர்களில் 90 கிட்ஸ் யாரெல்லாம் கல்யாண பந்தத்தில் இணையப்போகிறீர்கள் என்ன மந்திரங்கள் சொல்லி வணங்க வேண்டும் என்று பார்க்கலாம்.

மேஷம்: இதுநாள் வரை விரைய ஸ்தானத்தில் இருந்த குரு இனி ஜென்ம குருவாக அமர்கிறார். உங்கள் ராசிக்கு ஐந்தாம் வீடு, ஏழாம் வீடு, 9ஆம் வீடுகளின் மீது குருவின் பார்வை விழுவது சிறப்பான அம்சமாகும். கல்யாண யோகம் கைகூடி வரப்போகிறது. கணவன் மனைவிக்குள் அன்பும் பாசமும் அதிகரிக்கும். அப்பாவின் மூலம் பண வருமானம் அதிகரிக்கும். பூர்வீக சொத்துக்கள் மூலம் வருமானம் கிடைக்கும். பிள்ளைகள் வழியில் நன்மைகள் பல நடக்கும். நவகிரக குரு பகவானை "தேவனாம்ச ரிஷீணாம்ச குரும் காஞ்சன ஸந்நிபம்..பக்தி பூதம் த்ரிலோகேசம் தம் நமாமி ப்ருஹஸ்பதிம்" என்ற மந்திரம் சொல்லி வணங்கலாம். திருச்செந்தூர் சென்று முருகனை தரிசனம் செய்து வர நன்மைகள் அதிகரிக்கும்

ரிஷபம்: ரிஷப ராசிக்காரர்களுக்கு குருபகவான் லாப ஸ்தானத்தில் இருந்து விரைய ஸ்தானத்திற்கு வருகிறார். குருவின் பார்வை சுக ஸ்தானமான 4ஆம் வீடு, ரோக ஸ்தானமான 6 ஆம் வீடு ஆயுள் ஸ்தானமான 8ஆம் வீட்டின் மீது விழுகிறது. இந்த ராசிக்காரர்கள் விரைய சனியால் கவலைப்பட்டாலும் இனி குரு பெயர்ச்சியினால் பிரச்சினைகள் நீங்கும் சொத்து வாங்கலாம். சுப விரைய செலவுகள் ஏற்படும். நோய்கள் தீரும், கடன்கள் தீரும் காலம் வந்து விட்டது. ஆயுளுக்கு வந்த கண்டம் நீங்கும். ரிஷப ராசிக்காரர்கள் தென் திட்டையில் அருள்பாலிக்கும் ராஜ குருவை வழிபட்டு "ஓம் பிரஹஸ்பதீச வித்மஹே சுராசார்யாய தீமஹி தந்நோ குரு ப்ரசோதயாத்" என்ற மந்திரத்தை சொல்லி வணங்கலாம்.

மிதுனம்: மிதுன ராசிக்காரர்களே குரு பகவான் லாப ஸ்தானத்தில் அமர்வது சிறப்பான அம்சமாகும். குருவின் பார்வை முயற்சி ஸ்தானமான 3ஆம் வீடு, பூர்வீக புண்ணிய ஸ்தானமான 5ஆம் வீடு, களத்திர ஸ்தானமான 7ஆம் வீடுகளின் மீது விழுகிறது. குரு பார்வையால் உங்களுக்கு கல்யாண யோகம் வந்து விட்டது. 90 கிட்ஸ் வீட்டில் கெட்டிமேளச்சத்தம் கேட்கும். சிலருக்கு குழந்தை பாக்கியம் கிடைக்கும் வாய்ப்பு உள்ளது. பூர்வீக சொத்துக்களினால் வருமானம் கிடைக்கும். செய்யும் முயற்சிகள் வெற்றியாக அமையும். இந்த குருப்பெயர்ச்சியால் மிதுன ராசிக்காரர்கள் செல்ல வேண்டிய பரிகார ஸ்தலம் ஆலங்குடி ஆபத்சகாயேஸ்வரர் கோவிலில் அருள்பாலிக்கும் குரு பகவானை வணங்கவும். "ஓம் விரு‌ஷபத் வஜாய வித்மஹே க்ருணி ஹஸ்தாய தீமஹி தந்நோ குருஹ் ப்ரசோதயாத்" என்ற குரு காயத்ரி மந்திரம் சொல்லி வணங்கலாம்.

கடகம்: கடக ராசிக்காரர்களுக்கு 10ஆம் வீடான தொழில் ஸ்தானத்தில் குரு அமர்வது பாதகத்தை ஏற்படுத்தாது. குருவின் பார்வை 2ஆமிடம், 4ஆம் இடம், 6 ஆம் இடங்களின் மீது விழுவது சிறப்பான அம்சம். குடும்பம் குதூகலமாக இருக்கும். உற்சாகமாக குடும்பத்தினருடன் நேரத்தை செலவு செய்வீர்கள். வருமானம் அதிகரிக்கும். புது வீடு, இடம், வாகனம் வாங்குவீர்கள். நோய்கள், கடன்கள் தீரும் காலம் வந்து விட்டது. எதிரிகள் தொல்லை நீங்கும். நினைத்த காரியம் நிறைவேறும். "குரு பிரஹ்மா குரு விஸ்ணு குரு தேவோ மகேச்வர:
குரு சாஷாத் பரப்ரஹ்மை தஸ்மை ஸ்ரீகுருவே நமஹ.".என்ற மந்திரம் சொல்லி குரு பகவானை வணங்கலாம்.

சிம்மம்: பாக்கிய குருவாக 9ஆம் இடத்தில் குரு அமர்வது சிறப்பானது. குருவின் குருவின் பார்வை ராசியின் மீது விழுகிறது. குரு பலன் வந்து விட்டது திருமணம் உள்ளிட்ட சுப காரியங்கள் நிகழும். ராசிக்கு 3ஆம் இடம், 5 ஆம் இடங்களின் மீது குருவின் பார்வை படுவதால் முயற்சிகள் வெற்றியடையும், புத்திர பாக்கியம் கிடைக்கும். பூர்வீக சொத்துக்களினால் வருமானம் உண்டு. பிள்ளைகள் மூலம் நல்ல செய்திகள் தேடி வரும். குழந்தைகளுக்கு சுப நிகழ்ச்சிகள் நடைபெறும். "ஓம் ஷ்ரம் ஷ்ரீம் ஷ்ரௌம் ஸஹ் குரவே நமஹ!" என்ற மந்திரத்தை சொல்லி குரு பகவானை வணங்கலாம்.

கன்னி: குருபகவானின் பார்வை உங்கள் ராசிக்கு குடும்ப ஸ்தானமான இரண்டாம் வீடு மீதும், சுக ஸ்தானமான 4ஆம் வீடு மீது, விரைய ஸ்தானமான 12வது வீடு மீதும் விழுகிறது. குரு அஷ்டம ஸ்தானமாக சனி பகவானுடன் அமர்ந்து தனது அருட்பார்வையால் உங்களை பார்க்கிறார். குடும்பத்தில் இருந்த கஷ்டங்கள் நீங்கும். குடும்பம் குதூகலமாக அமையும், கணவன் மனைவி இடையே உற்சாகம் அதிகரிக்கும். "உத்தமனே! உயர்ந்தவனே!தத்துவத்தின் நாயகனே ! சித்தனே! புத்திரருக்கு அதிபதியே! பொன் மகனே! நித்தம் உன்னைப் பணிவேன்- பக்தியுடன் பதம் பணிவேன் பிரகஸ்பதியே போற்றி! போற்றி!" என்று குரு பகவானை நினைத்து வணங்கலாம்.

துலாம்: பொன்னவன் குரு பகவான் 7ஆம் வீட்டில் அமர்ந்து தனது ஏழாம் பார்வையால் உங்கள் ராசியை பார்க்கிறார் குருபகவான். குடும்பத்தில் கணவன் மனைவி இடையே உற்சாகம் அதிகரிக்கும். குருபலன் வந்து விட்டது திருமணம் கைகூடி வரும். காதல் வெற்றியடையும். 9ஆம் பார்வையால் உங்களின் முயற்சி ஸ்தானமான 3 ஆமிடத்தை பார்வையிடுவதால் செய்யும் முயற்சிகளில் வெற்றி கிடைக்கும். இளைய சகோதரர்களின் ஆதரவு கிடைக்கும். 5ஆம் பார்வையால் உங்க லாப ஸ்தானத்தை பார்வையிடுவதால் செய்யும் தொழிலில் லாபம் கிடைக்கும். மூத்த சகோதரரின் அன்பு அதிகரிக்கும். பாக்கெட் நிறைய பணம் வரும். "ஓம் விரு‌ஷபத் வஜாய வித்மஹே க்ருணி ஹஸ்தாய தீமஹி தந்நோ குருஹ் ப்ரசோதயாத்" என்ற மந்திரத்தை சொல்லி குரு பகவானை வணங்கலாம்.

விருச்சிகம்: குருபகவான் உங்கள் ராசிக்கு 6ஆம் வீடான ருண ரோக ஸ்தானத்தில் அமர்ந்து உங்கள் ராசிக்கு 2ஆம் வீடு, 12ஆம் வீடு 10ஆம் வீடுகளை பார்வையிடுகிறார். குடும்பத்தில் உற்சாகம் கூடும். பணவரவு அதிகரிக்கும். அதே நேரத்தில் இந்த நேரத்தில் கடன் வாங்க வேண்டாம். மறைந்திருந்த நோய்கள் வெளிப்படும். நோய்களை குணப்படுத்த பணம் வரும். வெளிநாடு செல்லும் யோகம் வரும் சுப விரையம் ஏற்படும். புதிய தொழில் தொடங்கலாம். வேலையில் புரமோசன் கிடைக்கும். சிலருக்கு பதவியில் மாற்றம் வரும். சந்தோஷமான சம்பவங்கள் அதிகம் நடைபெறும். "ஓம் நமோ பகவதே தக்ஷிணாமூர்த்தயே..மஹ்யம் மேதாம் ப்ரஞ்ஞாம் ப்ரயச்ச ஸ்வாஹா" என்ற மந்திரத்தை சொல்லி வணங்கலாம்.

தனுசு: உங்கள் அதிபதி குருபகவான் உங்கள் ராசிக்கு 5 ஆம் வீடான பூர்வீக புண்ணிய ஸ்தானத்தில் அமர்ந்து உங்கள் ராசியை பார்வையிடுகிறார். ராசிக்கு 11ஆம் வீடான லாப ஸ்தானம் 9ஆம் வீடான பாக்கிய ஸ்தானத்தையும் குரு பகவான் பார்வையிடுகிறார். உங்களுக்கு குரு பலன் வந்து விட்டுவிட்டது. வெளியூர், வெளிநாடு பயணம் செல்லக்கூடிய நேரம் வந்து விட்டது. 11 ஆம் வீட்டை பார்வையிடுவதால் செய்யும் தொழிலில் லாபம் அதிகரிக்கும். மூத்த சகோதரரின் உதவி கிடைக்கும். திருமண யோகமும் குழந்தை பாக்கியமும் கைகூடி வருகிறது. "குணமிகு வியாழ குருபகவானே!.மணமுள வாழ்வை மகிழ்வுடன் அருள்வாய்!..பிரகஸ்பதி வியாழ பர குரு நேசா!.."கிரக தோஷமின்றிக் கடாட்சித் தருள்வாய்! என்ற மந்திரத்தை சொல்லி வணங்கலாம்.

மகரம்: குருபகவான் உங்கள் ராசிக்கு 4ஆம் வீட்டில் அமர்கிறார் உங்கள் ராசிக்கு 12ஆம் வீடான விரைய ஸ்தானம், ராசிக்கு 10ஆம் வீடான தொழில் ஸ்தானம், ராசிக்கு 8ஆம் வீடான ஆயுள் ஸ்தானத்தையும் பார்வையிடுகிறார். இந்த பார்வை விஷேசமான பலன்களை உங்களுக்குத் தரும். புதிய தொழில் தொடங்கலாம். பணி செய்யும் இடத்தில் புரமோசன் கிடைக்கும். 8 ஆம் வீட்டை பார்வையிடுவதால் திடீர் அதிர்ஷ்டத்தின் மூலம் பணம் கிடைக்கும். சிலருக்கு சுப விரைய செலவுகள் ஏற்படும். "வளமெலாம் அளித்திடும் வியாழா போற்றி..குலமெலாம் தழைத்திட வருவாய் போற்றி..புலமெலாம் மலர்ந்திட முனைவாய் போற்றி..உலகெலாம் உவந்திட அருள்வாய் போற்றி!" என்ற மந்திரத்தை சொல்லி குரு பகவானை வணங்கலாம்.

கும்பம்: குருபகவான் உங்கள் ராசிக்கு 3ஆம் வீட்டில் அமர்கிறார். குருவின் பார்வை 11ஆம் வீடான லாப ஸ்தானம். 9ஆம் இடமான பாக்கிய ஸ்தானம், 7ஆம் இடமான களத்திர ஸ்தானங்களின் மீது விழுகிறது. காதல் மலரும் காலம் இது. காதல் கனிந்து கல்யாணத்தில் முடிய வாய்ப்பு உள்ளது. உங்கள் வீட்டில் கெட்டிமேளம் கொட்டும் சத்தம் கேட்கும் யோகம் வந்து விட்டது. "ஓம் நமோ பகவதே தக்ஷிணாமூர்த்தயே..மஹ்யம் மேதாம் ப்ரஞ்ஞாம் ப்ரயச்ச ஸ்வாஹா" என்ற மந்திரத்தை 9 முறை சொல்லி குரு பகவானை வணங்கலாம்.

மீனம்: ஜென்ம குருவாக இருந்து தடைகள் பாதிப்புகளை ஏற்படுத்தி வந்த குரு பகவான் இன்று முதல் குடும்ப ஸ்தானத்தில் அமர்கிறார். தன ஸ்தானம், வாக்கு ஸ்தானத்தில் அமர்ந்து குரு உங்கள் ராசிக்கு 6ஆம் வீடான கடன் ஸ்தானம், 8ஆம் வீடான ஆயுள் ஸ்தானம், 10ஆம் வீடான தொழில் ஸ்தானத்தின் மீது குருவின் பார்வை விழுகிறது. கடந்த ஓராண்டு காலமாக நீங்கள் பட்ட கடன்கள் தீரும் காலம் வந்து விட்டது. நோய்கள் தீரும் காலமும் வந்து விட்டது. வேலை தேடுபவர்களுக்கு நல்ல வேலை கிடைக்கும். "குரு பிரஹ்மா குரு விஸ்ணு குரு தேவோ மகேச்வர:
குரு சாஷாத் பரப்ரஹ்மை தஸ்மை ஸ்ரீகுருவே நமஹ." என்ற மந்திரத்தை தினசரியும் 11 முறை சொல்லி குரு பகவானை வணக்க நன்மைகள் நடைபெறும்.

English summary

Guru Peyarchi palangal 2023 Tamil Jupiter Transit 2023-2024 Guru In Meenam from April 22nd 2023 Guru Parvai Palangal and Parikara stalangal Chant mantras For The 12 Rasigal.Lord Guru transits to Aries. Guru's vision is a million benefits. Places of sight are more beneficial than where Guru Bhagavan.