சனி பெயர்ச்சி பலன் 2022: சனி பகவானின் பார்வையால் பாதிப்பு யாருக்கு - பரிகாரம் என்ன?

சனிபகவான் அமர்ந்திருக்கும் இடத்தை விட பார்க்கும் இடத்திற்கு பாதிப்பு அதிகம் என்று சொல்வார்கள். கும்ப ராசிக்கு இடப்பெயர்ச்சியாகும் சனிபகவான் எந்த ராசிகளை பார்வையிடுகிறார் பாதிப்பு என்ன பரிகாரம் என்ன என்று பார்க்கலாம்.

சென்னை: சனிபகவான் அடுத்த மாதம் ஏப்ரல் 29ஆம் தேதி மகர ராசியில் இருந்து கும்ப ராசிக்கு இடப்பெயர்ச்சி அடைகிறார். 2025ஆம் ஆண்டு மார்ச் 29ஆம் தேதி வரை கும்ப ராசியில் ஆட்சி பெற்று அமர்ந்திருப்பார் சனி பகவான். கும்ப ராசியில் உள்ள சனிபகவான் ஜூன் முதல் கும்ப ராசியில் இருந்து பின்னோக்கி நகர்ந்து மகர ராசிக்கு செல்கிறார். அவர் மகர ராசியில் 2023 ஜனவரி 17ஆம் தேதி வரை இருந்து, பின் மீண்டும் நேர்கதியில் கும்ப ராசிக்கு இடப்பெயர்ச்சி அடைவார்.

சனி பகவான் ஒருவரின் ராசிக்கு 3,5,6,9,10,11 ஆகிய இடங்களில் சஞ்சரிக்கும் கால கட்டத்தில் சங்கடங்கள் இல்லாத சந்தோஷங்களைத் தருவார். ஏழரை சனி காலத்தில் சனிபகவான் விரையசனி, ஜென்மசனி, பாதசனி என படிப்பினைகள் கொடுப்பார். அர்தாஷ்டம சனி, கண்டச்சனி, அஷ்டம சனி, என கஷ்டப்பட்டாலும் கடைசியில் நல்ல விசயங்களை கற்றுக்கொடுப்பார்.

சனிபகவான் நீதிமான் என்பதால் அவர் சோதனைதான் கொடுப்பார். தண்டனை என்ற பெயரில் புத்தி புகட்டுவார். சிலருக்கு கோடி கோடியாக கொடுப்பார். விபரீத ராஜயோகத்தையும் தருவார். நிகழப்போகும் சனிப்பெயர்ச்சியால் யாருக்கு எந்த மாதிரியான பலன்கள் கிடைக்கும்

மேஷம் - லாப சனி

மேஷம் ராசிக்காரர்களுக்கு லாப சனி காலமாகும். செய்யும் தொழிலில் லாபமும், அபரிமிதமான வருமானமும் கிடைக்கும். திருமணமான தம்பதிகளுக்கு குழந்தை பாக்கியம் கிடைக்கும். உங்களின் செல்வாக்கும் சொல்வாக்கும் உயரும். சிலர் விமானம் ஏறி வெளிநாடு செல்வீர்கள். அந்நிய தேசத்து வருமானம் உங்களை கோடீஸ்வரர் ஆக்கும். சனிபகவான் பார்வை உங்க ராசியில் விழுவதும் கூடுதல் பலம். சனிபகவானின் மூன்றாம் பார்வை உங்கள் ராசிக்கு கிடைப்பதால் சனிக்கிழமையன்று நல்லெண்ணெய் தீபம் ஏற்றி சனிபகவானை வணங்குவது நல்லது.

ரிஷபம் - தொழில் சனி

ரிஷப பத்தாம் வீடான தொழில் ஸ்தானத்தில் அமரப்போவதால் செய்யும் தொழில் வளர்ச்சியடையும். ஆட்சி பெற்ற சனியால் சச யோகம் செயல்படும். புது வேலை கிடைக்கும். பதவியில் புது உற்சாகம் கிடைக்கும். சனியால் கொடுக்கும் பதவி, சொத்துக்களை யாராலும் அசைக்க முடியாது. கோடீஸ்வர யோகம் வரப்போகிறது. சனி கொடுப்பதை பத்திரமாக பாதுகாத்து தான தர்மங்கள் செய்யுங்கள். திருமணம் நடக்கும், குழந்தை பாக்கியம் கிடைக்கும். கவுரவம் அந்தஸ்து அதிகரிக்கும்.

மிதுனம் - பாக்ய சனி

மிதுன ராசிக்காரர்களே அஷ்டம சனியால் கடந்த இரண்டரை ஆண்டுகாலமாக படாத பாடு பட்டிருப்பீர்கள். அஷ்டம சனி முடிந்து பாக்கிய சனி தொடங்குகிறது. சனியால் யோகங்கள் அதிகம் கிடைக்கும். பணவரவு அதிகரிக்கும். அசையும் அசையா சொத்துக்களை வாங்குவீர்கள். நிறைய தர்மங்களை செய்யுங்கள். ஏனெனில் இது தர்ம சனி காலம். வேலையில் சம்பள உயர்வு புரமோசன் கிடைக்கும். தொழிலில் லாபம் அதிகரிக்கும். நகை, பொன் பொருள் சேர்க்கை அதிகரிக்கும்.

கடகம் - அஷ்டம சனி

சனிபகவான் இதுநாள் வரை கண்டச்சனியாக இருந்து கஷ்டங்களைக் கொடுத்தார் இனி எட்டாம் வீட்டில் அஷ்டம சனியாக அமரப்போகிறார். எட்டாம் வீட்டு அதிபதி சனி எட்டில் ஆட்சி பெற்று அமர்வது விபரீத ராஜயோக காலமாகும். இந்த கால கட்டத்தில் சில பிரச்சினைகளை எதிர்கொண்டாலும் அவை உங்களுக்கு சாதகமாகவே முடியும். திடீர் பணவரவு கிடைக்கும். அதிர்ஷ்டங்களும் தேடி வரும்.

சிம்மம் - கண்டச்சனி

சிம்ம ராசிக்காரர்களே இதுநாள் வரை ஆறாம் வீட்டில் அமர்ந்து சனிபகவான் எண்ணற்ற வருமானங்கள், செல்வங்களை கொடுத்து வந்தார். இனி சனிபகவான் உங்கள் ராசிக்கு ஏழாம் வீட்டில் கண்டச்சனியாக அமரப்போகிறார். மிகப்பெரிய யோகம் வரப்போகிறது. வேலையில் வியாபாரத்தில் இருப்பவர்களுக்கு பதவி உயர்வு கிடைக்கும். திருமணம் தடைகளை தாண்டி நடைபெறும். சனிபகவான் உங்க ராசியை பார்ப்பதால் கண்டச்சனியையும் கஷ்டமில்லாமல் கடந்துவிடுவீர்கள். வேலை மாற்றம் இடமாற்றத்திற்கு காத்திருப்பவர்களுக்கு வேலை கிடைக்கும். வெளி நாடு செல்ல நினைப்பவர்களுக்கு விசா கிடைக்கும்.

கன்னி - ருண ரோக சத்ரு சனி

கன்னி ராசிக்காரர்களே கவலைகள் நீங்கப்போகிறது. சனி பகவான் ஆறாம் வீட்டில் அமர்ந்து முழு ராஜயோகத்தையும் தரப்போகிறார். சனி பகவான் தனது சொந்த வீட்டுக்கு வருவதால் நோய்கள் தீரும். கடன்கள் கட்டுப்படும். அசையா சொத்துக்களை வாங்குவீர்கள். திடீர் அதிர்ஷ்டங்கள் அமையும். புதிய தொழில்களை ஆரம்பிக்க லாபங்கள் கொட்டும். இனி இரண்டரை ஆண்டு காலம் உங்களுக்கு ராஜயோக காலம். சுகங்கள் தேடி வரும். செல்வமும் செல்வாக்கும் கூடும். ஆறாம் வீட்டு அதிபதி சனி ஆறில் ஆட்சி பெற்று அமர்ந்து விபரீத ராஜயோகத்தை தரப்போகிறார்.

துலாம் - பூர்வ புண்ணிய சனி

துலாம் ராசியில் சனிபகவான் உச்சமடைபவர் என்பதால் உங்களுக்கு எந்த கெடுதலும் செய்யமாட்டார். சனிபகவான் அர்த்தாஷ்டம சனியாக சில கஷ்டங்களைக் கொடுத்தார், அம்மாவின் உடல்நலப்பிரச்சினைகள் இனி சரியாகும். இனி பூர்வஜென்ம புண்ணியங்களை கொண்டு வந்து அறுவடை செய்வீர்கள். நல்லது அதிகம் நடக்கும். சனி உங்க ராசிக்கு ஐந்துக்கு உடையவர் என்பதால் வேலையில் இல்லாதவர்களுக்கு புதிய வேலை கிடைக்கும். திருமண தடைகள் நீங்கும். சனி பெயர்ச்சி பல நன்மைகளையும் யோகங்களையும் தரப்போகிறது. பணவரவு அதிகமாகவே இருக்கும். தொழில் வளர்ச்சி பெறும்.

விருச்சிகம் - அர்த்தாஷ்டம சனி

விருச்சிக ராசிக்காரர்களுக்கு அர்த்தாஷ்டம சனி வரப்போகிறது. நான்காம் வீட்டு அதிபதி நான்கில் ஆட்சி பெற்று அமர்வதால் பாதிப்புகள் இருக்காது. சனியின் பத்தாவது பார்வை உங்க ராசி மீது விழுவதால் தொழில் பிரச்சினைகள் முடிவுக்கு வரும். வேலையில் இருப்பவர்களுக்கு புரமோசன் கிடைக்கும். பணவரவு அதிகரிக்கும் அதே நேரத்தில் நோய்களும் வெளிப்படும். நோய்களை குணப்படுத்துவீர்கள். தனவரவு அதிகரிக்கும். ஆசைகளை குறிக்கோள்களை சனி நிறைவேற்றுவார்.

தனுசு - தைரிய சனி

ஏழரை ஆண்டுகாலமாக சனி தனுசு ராசிக்காரர்களை ஆட்டி படைத்தது. ஏழரை சனி முடிவுக்கு வரப்போகிறது. இனி நன்மைகள் தேடி வரும் காலம். ஏழரை ஆண்டுகாலமாக துன்பப்பட்டு சாவின் கடைசி நுனிவரை பார்த்து விட்டு வந்திருப்பீர்கள். உங்களின் துன்பங்கள், துயரங்கள் நீங்கும் காலம் வந்து விட்டது. வராத பணம் தேடி வரும் முன்னேற்றத்திற்கு வழி கிடைக்கும். கொடுத்த கடன்கள் வசூலாகும். பயணங்கள் வெற்றியை கொடுக்கும். மன நிம்மதி அதிகரிக்கும் நோய்கள் நீங்கி ஆரோக்கியம் அதிகரிக்கும்.

மகரம் - பாத சனி

ஏழரை சனியில் ஜென்ம சனியால் அதிகம் கஷ்டப்பட்டுக்கொண்டிருக்கும் மகர ராசிக்காரர்கள் கொஞ்சம் பெருமூச்சு விட்டுக்கொள்ளலாம். காரணம் ஜென்ம சனி விலகுகிறது. தன வருமானமும் லாபமும் கிடைக்கும். சனியின் பார்வை ராசிக்கு நான்காம் வீடு, எட்டாம் வீடு,பதினொன்றாம் வீடுகளின் மீது விழுவதால் கஷ்டங்களை எளிதாக கடந்து விடலாம். புது தெம்பு வந்து விடும். ஏழரை சனியின் கடைசி இரண்டரை ஆண்டு காலம் பாத சனியாக தொடர்வதால் கொஞ்சம் கவனம் தேவை.

கும்பம் - ஜென்ம சனி

கும்ப ராசிக்காரர்களுக்கு இரண்டரை ஆண்டு காலம் ஜென்மசனி தொடங்குகிறது. சனி பகவான் தன்னுடைய ராசியில் ஆட்சி பெற்று அமரப்போகிறார் வேலை செய்யும் இடத்தில் நிம்மதியை தருவார். அனுபவங்களினால் பக்குவப்படுத்துவார். உங்கள் ராசிநாதன் என்பதால் அதிகம் கஷ்டப்படுத்தமாட்டார். இந்த சனிப்பெயர்ச்சியை எளிதாக கடந்து விடுவீர்கள். கடினமாக உழைப்பீர்கள், பொறுப்பு அதிகரிக்கும். முதல் சுற்றில் உள்ளவர்களுக்கு ஜென்ம சனி மன அழுத்தம், தடுமாற்றங்களை தருவார். 30 வயதிற்கு மேற்பட்ட சிலர் தொழில் தொடங்குவீர்கள். கடல் கடந்து செல்லும் எண்ணம் வரும். தேர்வுகளில் வெற்றி பெறுவீர்கள்.

மீனம்

இந்த ஆண்டு முதல் மீன ராசியில் பிறந்தவர்களுக்கு ஏழரை சனியில் விரைய சனி தொடங்குகிறது. 12ஆம் வீட்டு அதிபதி தனது வீட்டில் ஆட்சி பெற்று அமர்வதால் விபரீத ராஜயோகத்தையும் தருகிறார் சனி. லாப சனி காலத்தில் சம்பாதித்த பணத்தை செலவு பண்ணும் காலம் வரப்போகிறது. சுப விரையத்திற்கு செலவு செய்வது நல்லது. இந்த கால கட்டத்தில் பணத்தை பணமாக வைத்திருக்காமல் சொத்துக்களில் முதலீடு செய்யலாம்.

English summary

Effects and Remedies of Sani Peyarchi in Tamil (சனி பகவானின் பார்வையால் பாதிப்பு யாருக்கு - பரிகாரம் என்ன): சனிபகவான் அமர்ந்திருக்கும் இடத்தை விட பார்க்கும் இடத்திற்கு பாதிப்பு அதிகம் என்று சொல்வார்கள். கும்ப ராசிக்கு இடப்பெயர்ச்சியாகும் சனிபகவான் எந்த ராசிகளை பார்வையிடுகிறார் பாதிப்பு என்ன பரிகாரம் என்ன என்று பார்க்கலாம்.