சென்னை வாகன ஓட்டிகளுக்கு.. பெரிய சிக்கல்.. எந்த பக்கம் போனாலும் கேட் போட்டா எப்படி? போச்சே

Updated: Monday, October 27, 2025, 17:41 [IST]

Subscribe to Oneindia Tamil

சென்னை: சென்னையில் பல்வேறு பகுதிகளில் சாலை பணிகள், மேம்பால பணிகள், விரிவாக்க பணிகள் நடப்பதால் மக்கள் பயணம் செய்வதில் கடும் சிக்கல் ஏற்பட்டு உள்ளது.

சென்னை மாநகரின் பரபரப்பான சந்திப்புகளில் ஒன்றான அடையாறு மத்திய கைலாஷ் சந்திப்பில், மாநில நெடுஞ்சாலைத் துறை ₹60.68 கோடி செலவில் அமைக்கும் 'L' வடிவ மேம்பாலப் பணிகள் நிறைவடைந்த பிறகு, போக்குவரத்து நெரிசல் கணிசமாகக் குறையும் என எதிர்பார்க்கப்படுகிறது.

அடையார் பால பணிகள்

652 மீட்டர் நீளமுள்ள இந்த மேம்பாலத்தின் 19 தூண்களில் 17 தூண்கள் கட்டி முடிக்கப்பட்டுவிட்டன. மேலும் ஒரு தூண் விரைவில் அமைக்கப்பட உள்ளது. OMR பக்கத்தில் உள்ள 120 மீட்டர் நீள அணுகுசாலை முடிவடைந்துள்ள நிலையில், சர்தார் படேல் சாலைப் பகுதியில் 80 மீட்டர் நீள அணுகுசாலை கட்டுமானப் பணிகள் நடைபெற்று வருகின்றன.

நெடுஞ்சாலைத் துறை வட்டாரங்கள் தெரிவித்துள்ளபடி, "சந்திப்புக்கு மேலே உள்ள முக்கியமான மற்றும் 35 மீட்டர் நீளமுள்ள இறுதித் தூண் கட்டுமானத்திற்கு காவல்துறை அனுமதிக்குக் காத்திருக்கிறோம். நான்கு வழித்தடங்களில் வரும் வாகனங்களை இரண்டு வழித்தடங்களாகத் திருப்ப வேண்டும். MRTS நிலையத்திலிருந்து கூடுதல் இடம் பெற முடியுமா என்று ஆய்வு செய்து வருகிறோம். வானிலை ஒத்துழைத்தால், டிசம்பர் மாதத்திற்குள் பணிகளை முடிக்க நம்புகிறோம்" என்று தெரிவித்தன. ஆனால் அங்கே பால பணிகள் காரணமாக தற்காலிகமாக கடும் போக்குவரத்து நெரிசல் ஏற்படும் சூழல் உள்ளது.

மாதவரம் முதல் நல்லூர் சுங்கச்சாவடி

மாதவரம் முதல் நல்லூர் சுங்கச்சாவடி வரையிலான சாலை பகுதி சென்னையின் கடுமையான போக்குவரத்து நெரிசல் ஏற்படும் பகுதியாக மாறி உள்ளது. மாதவரம் முதல் நல்லூர் சுங்கச்சாவடி வரையிலான 10.3 கி.மீ தேசிய நெடுஞ்சாலைப் பகுதி, நாளொன்றுக்கு 80,000 முதல் 95,000 பயணிகள் வாகனங்கள் செல்லும் சாலை ஆகும். விதிமுறைப்படி இது 10 வழிச்சாலையாக இருக்க வேண்டும்.

ஆனால், நிலம் கையகப்படுத்துதல் மற்றும் வணிகர்களின் எதிர்ப்பு காரணமாக, கடந்த பத்தாண்டுகளுக்கும் மேலாக இது நான்கு வழிச்சாலையாகவே உள்ளது, இதனால் பயணிகள் பெரும் சிரமங்களை எதிர்கொள்கின்றனர்.

பாடிக்கும் திருநின்றவூருக்கும் இடையிலான சாலை

இதேபோல், பாடிக்கும் திருநின்றவூருக்கும் இடையிலான 22 கி.மீ நீளச் சாலையை ஆறு வழிச்சாலையாக மாற்றும் திட்டம், 2012-ல் வணிகர்களின் எதிர்ப்பு காரணமாக கைவிடப்பட்டது. இது தற்போது திருப்பதி செல்லும் வாகனங்களுக்கும், ஆந்திரா மற்றும் கர்நாடகாவுக்கு சரக்கு போக்குவரத்துக்கும் முக்கிய போக்குவரத்து நெரிசல் பகுதியாக மாறியுள்ளது.

முன்னதாக, மாதவரம்-நல்லூர் சுங்கச்சாவடி பகுதியை ஆறு வழிச்சாலையாக விரிவாக்கும் திட்டம், உள்ளூர் வணிகர்களின் கடும் எதிர்ப்பால் 2013-ல் கைவிடப்பட்டது. பின்னர், இதே நீளத்திற்கு 10.2 கி.மீ ஆறு வழி மேம்பாலச் சாலை அமைக்கும் திட்டமும் காலவரையின்றி ஒத்திவைக்கப்பட்டுள்ளது.

முக்கிய சாலை விரிவாக்கத் திட்டங்கள்

வடசென்னையில் காலவரையின்றி நிறுத்திவைக்கப்பட்ட பல முக்கிய சாலை விரிவாக்கத் திட்டங்களில் இவை சிலவாகும். குடியிருப்பாளர்கள், லாரி உரிமையாளர்கள் சங்கங்கள் மற்றும் தொழில்துறை குழுக்கள், சாலை உள்கட்டமைப்புத் திட்டங்கள் தொடர்ந்து நிர்வாக செயலற்ற தன்மையால் பாதிக்கப்படுவதாக குற்றம் சாட்டுகின்றன. குறிப்பாக, ஆந்திரா செல்லும் வழிகளில் உள்ள வடசென்னையின் நீண்டகாலமாக நிலுவையிலுள்ள சாலைத் திட்டங்களுக்கு தமிழக அரசும், தேசிய நெடுஞ்சாலை ஆணையமும் (NHAI) முன்னுரிமை அளிக்கவில்லை என உள்ளூர்வாசிகள் தெரிவிக்கின்றனர்.

2018-ல் அடையாளம் காணப்பட்ட ஏழு விபத்து அபாயப் பகுதிகளை நீக்கும் திட்டத்தின் ஒரு பகுதியாக, மாதவரத்தில் உள்ள சென்னை புறவழிச்சாலையிலிருந்து நல்லூர் சுங்கச்சாவடி வரையிலான 10.2 கி.மீ மேம்பாலச் சாலைக்கு தேசிய நெடுஞ்சாலை ஆணையம் ஒரு விரிவான திட்ட அறிக்கையைத் (DPR) தயாரித்தது. இந்த மேம்பாலம் சென்னை வெளிவட்டச் சாலையுடன் இணையும். இத்திட்டம் ஐந்து பெரிய மற்றும் ஐந்து சிறிய சந்திப்புகள் வழியாகச் செல்ல திட்டமிடப்பட்டது.

சாலை ₹1,893 கோடி செலவாகும்

இந்தத் திட்டத்திற்கு ₹1,893 கோடி செலவாகும் என மதிப்பிடப்பட்டது. இதில் 2 ஹெக்டேர் அரசு நிலமும், 1.8 ஹெக்டேர் தனியார் நிலமும் கையகப்படுத்தப்பட வேண்டும். மேலும், 32.43 ஹெக்டேர் இருக்கும் சாலைப் பரப்பு பயன்படுத்தப்படவும் இருந்தது.

தற்போது, தேசிய நெடுஞ்சாலை ஆணையம் இந்தத் திட்டத்தை கைவிட்டுவிட்டது . இதனால் இங்கேயும் கடுமையான போக்குவரத்து நெரிசல் நிலவி வருகிறது. மாதவரம்-நல்லூர் பகுதி மற்றொரு போக்குவரத்து நெரிசல் மையமாக மாறியுள்ளது.

துறைமுகம்-மதுரவாயல் மேம்பால விரைவுச் சாலை

தேசிய நெடுஞ்சாலை ஆணையம் தற்போது நகரின் மிகவும் நெரிசலான பகுதிகளில் ஒன்றான ₹5,570 கோடி மதிப்பிலான சென்னை துறைமுகம்-மதுரவாயல் மேம்பால விரைவுச் சாலையை அமைத்து வருகிறது. மேலும், மதுரவாயல் மற்றும் பூந்தமல்லி இடையே ₹1,241 கோடி செலவில் ஆறு வழி, 8.14 கி.மீ மேம்பாலச் சாலை அமைப்பதற்கான ஒப்பந்தப்புள்ளிகளையும் கோரியுள்ளது. ஆனால் அங்கே தற்போது பணிகள் நடப்பதால் பேரிகேட் போடப்பட்டு உள்ளது. இதனால் சாலையின் அளவு குறுகலாகி கடுமையான போக்குவரத்து நெரிசல் அங்கே ஏற்பட்டு உள்ளது.