Kara Box Office Day 1 : கர படத்தின் முதல் நாள் வசூல் நிலவரம்.. பாக்ஸ் ஆபீஸ் தனுஷுக்கு வெற்றியா? இல்லையா?
சென்னை: தனுஷ் நடிப்பில், விக்னேஷ் ராஜா இயக்கத்தில் உருவாகி ஏப்ரல் 30ஆம் தேதி வெளியாகியுள்ள கர திரைப்படம் தற்போது ரசிகர்கள் மத்தியில் பரபரப்பாக பேசப்பட்டு வருகிறது. இந்த நிலையில் படத்தின் (Kara Box Office) முதல் நாள் வசூல் நிலவரம் பற்றிய தகவல் வெளியாகியிருக்கிறது.
கர படத்தின் முதல் நாள் வசூல் நிலவரம்
படம் வெளியான முதல் நாளிலேயே உலகம் முழுவதும் சுமார் ரூ.9.14 கோடி வசூல் செய்ததாக வர்த்தக வட்டாரங்கள் தெரிவிக்கின்றன. இந்த வசூலில் தமிழக பாக்ஸ் ஆபிஸ் முக்கிய பங்காற்றியதாக கூறப்படுகிறது. குறிப்பாக சென்னை, கோயம்புத்தூர், மதுரை போன்ற நகரங்களில் காலை மற்றும் மாலை காட்சிகளில் நல்ல அளவு ரசிகர்கள் திரளாக வந்ததாக தகவல்கள் வெளியாகியுள்ளன.
கர படத்தின் கதை
இந்த படம் 1990களின் பின்னணியில் நடைபெறும் கதையாக அமைந்துள்ளது. அந்நேரத்தில் விவசாயிகள் எதிர்கொண்ட கடன் சிக்கல்கள், வங்கி அழுத்தம், பொருளாதார நெருக்கடி போன்ற அம்சங்கள் கதையின் மையமாக வைக்கப்பட்டுள்ளன. சாதாரண திருடனாக வாழும் ஒருவராக வரும் தனுஷ், குடும்ப சூழ்நிலையால் வங்கிக் கொள்ளையில் ஈடுபட வேண்டிய நிலைக்கு தள்ளப்படுகிறார்.
குறிப்பாக தந்தையின் மரணம், அவரை சொந்த நிலத்தில் அடக்கம் செய்ய முடியாத சூழல் போன்ற எமோஷனல் சம்பவங்கள் கதைக்கு வலு சேர்க்கின்றன. இதே நேரத்தில் அவரை பிடிக்க முயலும் போலீஸ் அதிகாரி சுராஜ் வெஞ்சரமூடு உடன் நடைபெறும் மோதலே படத்தின் முக்கிய அம்சமாகிறது.
படத்தின் பாசிட்டிவ்
படத்தின் முதல் பாதி மெதுவாக நகர்கிறது என்றாலும், அதில் அமைக்கப்பட்டுள்ள எமோஷனல் காட்சிகள் மற்றும் சமூக பின்னணி பலராலும் பாராட்டப்பட்டுள்ளது. இடைவேளையில் வரும் திருப்பம் எதிர்பாராத விதமாக அமைந்துள்ளது என்றும், அதன் பிறகு கதை வேகமாக நகர்கிறது என்றும் சில ரசிகர்கள் கருத்து தெரிவித்து வருகின்றனர். இரண்டாம் பாதியில் போலீஸ் மற்றும் தனுஷ் இடையே நடக்கும் சேசிங் காட்சிகள் படத்திற்கு த்ரில் சேர்க்கும் வகையில் உள்ளதாக கூறப்படுகிறது.
தனுஷின் நடிப்பு
நடிப்பைப் பொருத்தவரை, தனுஷ் தனது கதாபாத்திரத்திற்கு மிகவும் இயல்பான நடிப்பை வழங்கியுள்ளார் என்று ரசிகர்கள் பாராட்டுகின்றனர். அவருடன் நடித்துள்ள மமிதா பைஜு கிராமத்து பெண் கதாபாத்திரத்தில் நேர்த்தியான நடிப்பை வெளிப்படுத்தியுள்ளார். கே.எஸ். ரவிக்குமார் அப்பா கதாபாத்திரத்தில் உணர்ச்சி மிகுந்த நடிப்பை வழங்கியுள்ளார். போலீஸ் அதிகாரியாக வரும் சுராஜ் வெஞ்சரமூடு தனது தனித்துவமான நடிப்பால் கவனம் ஈர்த்துள்ளார்.
இசையை அமைத்துள்ள ஜி.வி. பிரகாஷ் குமார் படத்தின் உணர்ச்சி மற்றும் த்ரில் அம்சங்களுக்கு கூடுதல் பலம் சேர்த்துள்ளார். குறிப்பாக சில பாடல்கள் மற்றும் பின்னணி இசை காட்சிகளின் தாக்கத்தை அதிகரிக்கின்றன.
படத்தின் குறைகள்
இதே நேரத்தில், படம் குறித்து சில விமர்சனங்களும் வெளியாகியுள்ளன. குறிப்பாக திரைக்கதை வேகம் குறைவாக உள்ளது, வங்கி கொள்ளை காட்சிகளுக்கு தேவையான விறுவிறுப்பு சில இடங்களில் குறைகிறது, மற்றும் படத்தின் நீளம் அதிகமாக இருப்பது போன்ற குறைகள் சுட்டிக்காட்டப்படுகின்றன. இந்த நிலையில், பிரபல யூடியூப் விமர்சகர் புளூசட்டை மாறன் தனது விமர்சனத்தில் படத்தை கடுமையாக விமர்சித்துள்ளார்.
ப்ளூ சட்டை மாறன் ரிவ்யூ
அவரின் கருத்துப்படி, "பீரியட் படம் என்றாலும் அந்த காலத்திற்கான நம்பகத்தன்மை முழுமையாக தெரியவில்லை. வங்கி கொள்ளை கதை என்றாலும் அதற்கான த்ரில் மற்றும் பதட்டம் குறைவாக உள்ளது. படம் மிகவும் மெதுவாக நகர்கிறது; சில இடங்களில் சலிப்பை ஏற்படுத்துகிறது" என்று தெரிவித்துள்ளார்.
அதே நேரத்தில், சில ரசிகர்கள் இந்த படத்தை பாராட்டியும் வருகின்றனர். குறிப்பாக தனுஷின் நடிப்பு, அப்பா-மகன் உறவை மையமாகக் கொண்ட செண்டிமெண்ட் காட்சிகள் மற்றும் இடைவேளை திருப்பம் ஆகியவை படத்தின் முக்கிய பலங்களாக கூறுகின்றனர்.
மொத்தத்தில், "கர" திரைப்படம் ஒரு வித்தியாசமான கதைக்களத்துடன் உருவானாலும், அதன் மெதுவான திரைக்கதை காரணமாக சிலருக்கு பிடித்திருக்கிறது, சிலருக்கு சற்றே சலிப்பை ஏற்படுத்துகிறது. இருப்பினும், தனுஷின் நடிப்பு மற்றும் கதையின் உணர்ச்சி அம்சங்கள் காரணமாக படம் குறித்து பேசப்படும் அளவு தொடர்ந்து அதிகரித்து வருகிறது.
Click it and Unblock the Notifications
Sign in with Google