Mumait Khan: நரம்புகள் வெடித்து கோமாவுக்கு போன “என் பேரு மீனா குமாரி” டான்ஸ் நடிகை.. தற்போதைய நிலை!

சென்னை: ஒரு காலத்தில் தமிழ், தெலுங்கு, இந்தி உள்ளிட்ட பல மொழி படங்களில், ஒரு பாடலுக்கு வந்து மேடையே அதிர வைக்கும் டான்ஸ் ஆடி ரசிகர்களை கவர்ந்தவர் முமைத் கான். 'முமைத்' என்ற பெயர் வந்தாலே எனர்ஜி நிறைந்த டான்ஸ், கிளாமர், ஸ்டேஜ் பிரசென்ஸ் என்பவைதான் பலருக்கு ஞாபகம் வரும். ஆனால் சமீப ஆண்டுகளில் அவர் சினிமாவில் காணாமல் போனதற்கான காரணம், வெறும் இடைவெளி அல்ல; வாழ்க்கையே திசை மாறிய ஒரு பெரிய சம்பவம் தான்.

பெரிய விபத்து

2016ஆம் ஆண்டு அவரது வாழ்க்கையில் ஒரு திருப்புமுனை ஏற்பட்டது. வீட்டில் ஏற்பட்ட ஒரு விபத்தில் கீழே விழுந்த முமைத் கானுக்கு தலையில் பலத்த காயம் ஏற்பட்டது. மூளையில் நரம்புகள் பாதிக்கப்பட்டதால், பல நாட்கள் கோமாவில் இருந்ததாகவும், அதன்பின் நீண்ட கால மருத்துவ சிகிச்சை, ஓய்வு அவசியம் என்று மருத்துவர்கள் சொன்னதாக அவர் பின்னர் பேட்டிகளில் தெரிவித்துள்ளார். இந்த விபத்துக்குப் பிறகு, முன்பு போல தொடர்ந்து படங்களில் நடிப்பதும், கடினமான டான்ஸ் மூவ்ஸ்கள் செய்வதும் உடல்நிலையால் சாத்தியமாகாமல் போய்விட்டது.

நடிகை முமைத் கான் பேட்டி

அந்த நேரத்தில், "நான் ஏன் இப்படி ஆனேன்?" என்று உடைந்து போவதற்கு பதிலாக, வாழ்க்கையை வேறொரு கோணத்தில் பார்க்க ஆரம்பித்தார் முமைத் கான். நீண்ட ஓய்வு காலத்தில், தன்னைப் பற்றி, தனக்கு உண்மையிலேயே பிடித்த விஷயம் என்ன என்பதைக் கண்டுபிடிக்க முயன்றதாக அவர் கூறியுள்ளார்.

அப்போதுதான், மேக்கப், ஹேர் ஸ்டைலிங் மீது இருந்த தனது ஆர்வம் அவருக்கே புதிதாக வெளிப்பட்டதாம். படங்களில் நடித்த காலத்தில் மும்பையில் இருந்து மேக்கப் ஆர்டிஸ்ட்களை அழைத்து வர வேண்டிய சூழல் இருந்தது. "ஹைதராபாத்தில் ஏன் அந்த லெவலுக்கு ஆர்டிஸ்ட்கள் இல்ல?" என்ற கேள்வியே, ஒரு புதிய கனவாக மாறியது.

புதிய முயற்சி

அந்த கனவின் தொடர்ச்சியாக, தற்போது ஹைதராபாத்தில் 'WeLyke Academy' என்ற பெயரில் மேக்கப் மற்றும் ஹேர் ஸ்டைலிங் பயிற்சி மையத்தை நடத்தி வருகிறார் முமைத் கான். ஆரம்பத்தில் இந்த முயற்சியில் சில ஏமாற்றங்கள், பிரச்சினைகள் இருந்ததாகவும், இரண்டு முறை மோசடி நடந்த பிறகு தான் எல்லாவற்றையும் புதிதாக அமைத்துக் கொண்டதாகவும் அவர் வெளிப்படையாக கூறியுள்ளார். இருந்தாலும், அந்த தடைகளை தாண்டி இன்று தன்னுடைய அகாடமியை நிலைநிறுத்தி வருவது, அவரது மன உறுதியை காட்டுகிறது.

முமைத் கானின் பின்னணி வாழ்க்கையும் சுவாரஸ்யமானது. பாகிஸ்தானை சேர்ந்த தந்தை, திருச்சியை சேர்ந்த தாய் - இப்படியான பல பின்னணியில் வளர்ந்தவர். மும்பையில் வளர்ந்து, இளம் வயதிலேயே சினிமாவுக்குள் நுழைந்தார். தமிழ், தெலுங்கு, இந்தி, கன்னடம், பெங்காளி, ஒடியா என பல மொழி படங்களில் அவர் நடித்திருக்கிறார்.

முமைத்கான் டான்ஸ் பாடல்கள்

முக்கிய கதாபாத்திரங்களைவிட, குத்து பாடல்களுக்கு டான்ஸ் ஆடும் அவரது ஸ்பெஷல் அப்பியரன்ஸ்கள் தான் அவருக்கு அதிக அடையாளம் கொடுத்தது. அந்த காலத்தில், அவரது டான்ஸ் நம்பர்களுக்கே தனி ரசிகர் பட்டாளம் இருந்தது. அதிலும் தமிழில் வேட்டையாடு விளையாடு படத்தில் நெருப்பே சிக்கி முக்கி நெருப்பு, போக்கிரி படத்தில் என் செல்லப்பேரு ஆப்பிள், அதுபோல கந்தசாமி படத்தில் என் பேரு மீனா குமாரி போன்ற பல பாடல்களுக்கு டான்ஸ் அதிகரிக்கிறார். அதுமட்டுமல்லாமல் மலையூர் மம்பட்டியான் போன்ற படங்களில் நடிக்கவும் செய்திருக்கிறார்.

சினிமாவைத் தவிர, ரியாலிட்டி ஷோக்களிலும் அவர் பங்கேற்றுள்ளார். தெலுங்கு பிக் பாஸ் முதல் சீசனில் கலந்துகொண்டது, அவரை புதிய தலைமுறை ரசிகர்களிடமும் அறிமுகப்படுத்தியது. சில சர்ச்சைகளும் அவரை சுற்றி வந்தாலும், அதைப் பற்றி அவர் எப்போதும் "என்னை யாருக்கும் நிரூபிக்க வேண்டிய அவசியம் இல்லை; என் குடும்பத்தாருக்கு நான் எப்படி இருக்கிறேன் என்பதே எனக்கு முக்கியம்" என்ற கோணத்தில் பேசி வந்திருக்கிறார்.

இன்று முமைத் கான் முழுமையாக சினிமாவிலிருந்து விலகி விட்டாலும், வாழ்க்கையை விட்டுவிடவில்லை. திரையுலகின் வெளிச்சத்தில் இருந்து, பின்னணியில் உருவாக்கும் கலைஞர்களை உருவாக்கும் பணியில் அவர் ஈடுபட்டு வருகிறார். ஒரு நடிகையாக மேடையில் கைதட்டல் வாங்கியவர், இன்று மேக்கப் ஆர்டிஸ்ட்கள், ஹேர் ஸ்டைலிஸ்ட்களை உருவாக்கி, அவர்களுக்குப் பின்னால் இருந்து கைதட்டல் பெறும் நிலைக்கு வந்திருக்கிறார்.

மொத்தத்தில், முமைத் கானின் வாழ்க்கை ஒரு விபத்தால் தடைபட்டதாக தோன்றினாலும், அதே விபத்து தான் அவரை ஒரு புதிய பாதைக்கு அழைத்துச் சென்றது. சினிமாவில் க்ளாமர் டான்சராக அடையாளம் பெற்ற அவர், இன்று ஒரு தொழில்முனைவோர், பயிற்சியாளர் என்ற புதிய முகத்தோடு வாழ்க்கையைத் தொடர்கிறார். இது பலருக்கும் - "வாழ்க்கையில் ஒரு கதவு மூடப்பட்டால், இன்னொரு கதவு திறக்கும்" என்ற நம்பிக்கையை நினைவுபடுத்தும் உதாரணமாகவே பார்க்கப்படுகிறது.