இருந்தாலும் அழும் மனது

-ரிஷி சேது

முதல் தடவை போலில்லாமல் சற்று
முன்பே வந்தது வாந்தியும் தலை சுற்றலும்

நிலவும் நட்சத்திரங்களும் கூட வந்த பாதையெங்கும்
யோசித்தபடியே சென்று மருத்துவர்
செயல்காட்டியில் சிரித்த தலை வர உறுதியாயிற்று

முதல் குழந்தையிடம் இரவோடே பகிர்ந்து கொள்ள
பனிக்கரடி பொம்மையை கட்டிக் கொண்டே தூங்கியது
எழுந்ததும் என்னென்னவோ கேள்விகள் அதிலொன்று
வயிற்றுக்குள் பை இருப்பின்
கங்காருவாய் சுற்றுவாயா?

குவியும் துணிகளும்,சமையலும் மற்றும்
கழுவப்பட்டாத பாத்திரங்களும் மலைப்பாக
எப்போதும் போலவே எதற்கும் அதிர்ச்சி காட்டா
என் கணவன் அலுவலகம் புறப்பட
தனியே பேசிக்கொண்டிருந்தேன்

மெல்ல புரண்டாலும் அதிர்கிறது
யாரிடமும் தெரிவிக்காமலே நகர்கிறது
எப்படியும் தெரிந்துவிடப் போகிறது
இக்கவிதையாலோ அல்லது
வளரும் வயிற்றாலோ
இருந்தாலும் அழும் மனது
அம்மா பக்கதில்லாதது....

[email protected]